শ্ৰীভূমিত বাংলাদেশৰ ৰাষ্ট্ৰীয় সংগীতেৰে আৰম্ভ হ’ল কংগ্ৰেছৰ সেৱাদলৰ সভা : তীব্ৰ সমালোচনা শাসক পক্ষৰ

বৰাক উপত্যকাৰ শ্ৰীভূমি জিলাৰ জিলা কংগ্ৰেছ কমিটীৰ কাৰ্যালয়ত অনুষ্ঠিত এক সাংগঠনিক সভাত বাংলাদেশৰ ৰাষ্ট্ৰীয় সংগীত ‘আমাৰ সোণাৰ বাংলা’ পৰিৱেশন কৰা ঘটনাই ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰিছে। এই ঘটনা এনে এক সময়ত সংঘটিত হৈছে, যি সময়ত চুবুৰীয়া ৰাষ্ট্ৰ বাংলাদেশৰ বিৰুদ্ধে ভাৰত-বিৰোধী ভূমিকা গ্ৰহণৰ অভিযোগ উঠিছে।

শ্ৰীভূমি জিলা কংগ্ৰেছ সেৱাদলৰ এখন সাংগঠনিক সভাত জিলাখনৰ প্ৰবীণ কংগ্ৰেছী বিধুভূষণ দাসে মঞ্চত ‘আমাৰ সোণাৰ বাংলা’ শীৰ্ষক গীতটো পৰিৱেশন কৰে।

অসম চৰকাৰৰ মন্ত্ৰী কৃষ্ণেন্দু পালে এই কাৰ্যক ‘দুৰ্ভাগ্যজনক’ আৰু ‘গৰিহণাযোগ্য’ বুলি অভিহিত কৰিছে। শ্ৰীভূমিত এখন সংবাদমেলত মন্ত্ৰী পালে কয় যে কংগ্ৰেছে বাংলাদেশ প্ৰীতি প্ৰদৰ্শন কৰিছে, যিটো দেশৰ অভ্যন্তৰীণ সুৰক্ষাৰ প্ৰতি ভাবুকিস্বৰূপ। তেওঁ এই সমগ্ৰ ঘটনাৰ উচ্চস্তৰীয় তদন্তৰ দাবী জনাইছে।

সভাখনত উপস্থিত থকা প্ৰদেশ কংগ্ৰেছ সেৱাদলৰ অধ্যক্ষ দীপ বায়নে এই অভিযোগ খণ্ডন কৰিছে। তেওঁ দাবী কৰে যে বিধুভূষণ দাসে গীতটো বাংলাদেশৰ ৰাষ্ট্ৰীয় সংগীত হিচাপে নহয়, বৰঞ্চ কবিগুৰু ৰবীন্দ্ৰনাথ ঠাকুৰৰ ‘গীতাঞ্জলি’ কাব্যগ্ৰন্থৰ এক কবিতা হিচাপেহে সুৰ লগাই পৰিৱেশন কৰিছিল।

বায়নৰ মতে, কবিগুৰু এজন প্ৰকৃত ভাৰতীয় আৰু তেওঁৰ এই কবিতাটো দেশৰেই অমূল্য সম্পদ। তেওঁ শাসকীয় বিজেপিয়ে এই বিষয়টোক ৰাজনৈতিক অস্ত্ৰ হিচাপে অপপ্ৰচাৰ চলোৱা বুলি অভিযোগ কৰিছে।