বন বিষয়াৰ নেতৃত্বতে ধ্বংসৰ দিশে বুঢ়াচাপৰি অভয়াৰণ্য! কাণসাৰ নাই চৰকাৰ, বন বিভাগৰ

ধ্বংসৰ দিশে আগবাঢ়িছে বুঢ়াচাপৰি অভয়াৰণ্য। নগাওঁ জিলাৰ অন্তৰ্গত বুঢ়াচাপৰি অভয়াৰণ্য তথা কাজিৰঙা ৰাষ্ট্ৰীয় উদ্যানৰ সংৰক্ষিত বনাঞ্চল ৰূপে খ্যাত বুঢ়াচাপৰি অভয়াৰণ্যখন এতিয়া ধ্বংসৰ দিশে ঢাপলি মেলিছে। কিয়নো ইয়াৰ দায়িত্বত থকা বন বিষয়া চুনাম কুমাৰ গুপ্তাৰ নেতৃত্বতে এই ধ্বংসলীলা চলাৰ অভিযোগ উঠিছে।

বুঢ়াচাপৰি অভয়াৰণ্যখনৰ দায়িত্বত থকা বিষয়া সুনাম কুমাৰ গুপ্তা ৰহস্যজনকভাবে নিমাত হৈ থকাত সন্দেহৰ অৱকাশ সৃষ্টি হৈছে। বালি মাফিয়াই  অবৈধ খননকাৰ্য চলাই গৈছে।

বুঢ়াচাপৰি অভয়াৰণ্যৰ ভিতৰ ভাগত ব্ৰহ্মপুত্ৰৰ একেবাৰে কাষত বালি মাফিয়াই এই খননকাৰ্য চলাইছে। এক্সেভেটৰ আৰু ট্ৰেক্টৰৰ সহায়ত বালি মাফিয়াই এইদৰে একপ্ৰকাৰ সন্ত্ৰাস চলাই আছে। কিন্তু সকলো দেখিও চকু মুদা কুলিৰ ভাও ধৰিছে ৰাজ্যৰ বিয়াগোম বন বিভাগৰ বিষয়া-কৰ্মচাৰী সকলে।

লগতে পঢ়ক: জ্যোতি নৰসিংহানন্দৰ বিৰুদ্ধে পুনৰ ঘৃণা বিয়পোৱা ভাষণ দিয়াৰ অভিযোগ; দাখিল এজাহাৰ

স্থানীয় এগৰাকী সচেতন ব্যক্তিয়ে সমগ্ৰ ঘটনাটো বন বিষয়া চুনাম কুমাৰ গুপ্তাক অৱগত কৰাৰ পাছত বন বিভাগৰ কৰ্মচাৰী গৈ খনন কাৰ্য্যত বাধা প্ৰদান কৰি খনন বন্ধ কৰি দিছিল যদিও তাৰ এঘণ্টা পাছতেই পুনৰ ৰহস্যজনকভাবে বালি মাফিয়াই অবৈধ খনন চলাইছে।

উল্লেখ্য যে কিছুদিন পুৰ্বে বনবিভাগৰ সোপাঢিলা স্থিতিৰ বাবেই একাংশ দুষ্ট চক্ৰই বনৰীয়া মহ নিধন কৰি ভক্ষণ কৰিছিল। ইয়াৰ উপৰিও বিভিন্ন সময়ত বিভিন্ন ধৰণৰ অবৈধ কাৰ্যকলাপ এইজন বন বিষয়াই কাকো কেৰেপ নকৰাকৈ চলাই ৰাখি ব্যাপক অৰাজকতা সৃষ্টি কৰাৰ অভিযোগ উঠিছে।

কেতিয়াবা যদি বনৰীয়া জীৱ-জন্তু নিধন, আন কেতিয়াবা আকৌ অৰণ্যৰ ভিতৰৰ পৰা গছ-গছনি ধ্বংস। সকলোতে নিমাত বন বিষয়া সুনাম কুমাৰ গুপ্তা। স্থানীয় সচেতন ৰাইজে কৰা অভিযোগ মতে বন বিষয়া সুনাম কুমাৰ গুপ্তাই এক মোটা অংকৰ ধনৰ বিনিময়ত সকলো দেখিও নেদেখাৰ ভাও ধৰি থাকে।

লগতে পঢ়ক: অসমীয়া ভাষা আৰু অসমীয়াক কটু মন্তব্য কৰা অৰবিন্দ সিঙৰ আত্মসমৰ্পণ; কাণত ধৰি খুজিলে ক্ষমা

সেয়ে এইক্ষেত্ৰত সচেতন ৰাইজে এক উচ্চ পৰ্যায়ৰ তদন্তৰ বাবে অসম চৰকাৰক দাবী জনাইছে। অন্যথা এদিন হয়তো বুঢ়াচাপৰি অভয়াৰণ্য কেবল মানচিত্ৰতহে থাকিব, বাস্তৱত কেৱল মৰুভূমি সদৃশ দৃশ্যহে দেখা যাব।