Ambassador Returns: নতুন ৰূপত ভাৰতলৈ ঘূৰি আহিছে এম্বেছাদৰ! লক্ষ্য বৈদ্যুতিক গাড়ীৰ বজাৰ
ভাৰতত প্ৰসিদ্ধ এম্বেছাদৰ গাড়ীখন পুনৰ ঘূৰি আহিবলৈ ওলাইছে। পশ্চিম বংগৰ হিন্দুস্তান মটৰ্ছৰ কাৰখানাত নিৰ্মিত এই গাড়ীখনে এসময়ত ভাৰতীয় বজাৰত আধিপত্য বিস্তাৰ কৰিছিল।
২০১৪ চনত গাড়ীখনৰ উৎপাদন বন্ধ হৈ পৰে। জানিব পৰা গৈছে যে গাড়ীখনৰ উৎপাদন পুনৰ আৰম্ভ হ’ব। অৱশ্যে, এই গাড়ীখন বৈদ্যুতিক গাড়ী হিচাপে বজাৰলৈ অহাৰ সম্ভাৱনা আছে।
বাতৰি অনুসৰি, হিন্দুস্তান মটৰ্ছে এক ইউৰোপীয় গাড়ী নিৰ্মাতা সংস্থাৰ সৈতে চুক্তিবদ্ধ হৈ পুনৰ গাড়ীখনৰ উৎপাদন আৰম্ভ কৰিবলৈ আগবাঢ়িছে।
লগতে পঢ়ক: Booker Prize: প্ৰথমবাৰৰ বাবে ভাৰতীয় ভাষাত লিখা উপন্যাসলৈ সন্মান! গীতাঞ্জলি শ্ৰী-লৈ বুকাৰ বঁটা
অহা তিনি মাহৰ ভিতৰত কোম্পানী দুটাৰ মাজত অংশীদাৰিত্বৰ বিষয়টো চূড়ান্ত হ’ব বুলি জানিব পৰা গৈছে। আৰম্ভণিতে, দুখন বৈদ্যুতিক মটৰচাইকেল নিৰ্মাণ কৰা হ’ব আৰু ইয়াৰ অংশীদাৰিত্ব ৫১:৪৯ অনুপাতত হ’ব। অৱশ্যে, এই নতুন মডেল হিন্দুস্তান মটৰ্ছৰ চেন্নাই কাৰখানাত নিৰ্মাণ কৰা হ’ব। কাৰখানাটো চিকে বিৰলা গোটৰ এটা অংশ এইচএমএফচিআইৰ হাতত আছে।
চেন্নাইৰ এই কাৰখানাটোত মিটছুবিচিৰ গাড়ী নিৰ্মাণ কৰা হৈছিল আৰু পশ্চিম বংগৰ উত্তৰপাৰাৰ কাৰখানাটোত এম্বেছাদৰ নিৰ্মাণ হৈছিল।
১৯৭০-ৰ দশকত হিন্দুস্তান মটৰ্ছে ভাৰতৰ গাড়ীৰ বজাৰৰ ৭৫ শতাংশ দখল কৰিছিল। মাৰুতি-৮০০ ৰ দৰে কম দামী গাড়ী বজাৰলৈ অহাত এম্বেছাদৰ গাড়ীৰ বজাৰ হ্ৰাস পায়।
আনহাতে, দ্ৰুত পৰিৱৰ্তনশীল প্ৰযুক্তিৰ সৈতে খাপ খাব নোৱাৰাটোও এম্বেছাদৰ বজাৰৰ পৰা আঁতৰি যাবলগীয়া হোৱাৰ এটা কাৰণ আছিল।