সহযোদ্ধা! কোভিডৰ দ্বিতীয় ঢৌত গোলাঘাটত এজনে আনজনৰ হাতত ধৰি কৰ’না যুদ্ধত অৱতীৰ্ণ
গণশিল্পী ড° ভূপেন হাজৰিকাৰ গীতৰ কথাৰে, মানুহে মানুহৰ বাবে /যদিহে অকনো নেভাৱে/ অকনি সহানুভূতিৰে /ভাৱিব কোনেনো কোৱা- এই কালজয়ী গীতৰ পদাংক অনুসৰণ কৰি কৰ’না কালৰ এনে জটিল সময়ত মানুহৰ বাবে ওলাই আহিছে গোলাঘাট কছাৰীহাটৰ জীৱনজ্যোতি ক্লাব।
যিহেতু পুনৰ আৱিৰ্ভাৱ হৈছে কৰ’নাৰ সংহাৰী ৰূপ। পূৰ্বৰ দৰে এইবাৰো এজনে আনজনৰ হাত ধৰি কৰ’নাৰ যুদ্ধত অৱতীৰ্ণ হোৱাৰ পণ লৈছে গোলাঘাটৰ এইসকল সচেতন ব্যক্তিয়ে।
এনে বিপদৰ সময়ত ‘মানুহে মানুহৰ বাবে’ তাকেই পুনৰ বাৰ প্ৰতিপন্ন কৰিছে কৰ’নাৰ এই দ্বিতীয়টো সংস্কৰণে।
মানুহৰ মাজত সজাগতাৰ লক্ষ্যৰে জীৱনজ্যোতি ক্লাৱৰ সদস্য সকলে কছাৰীহাট তিনিআলিত মাস্ক বিতৰণ কৰাৰ লগতে মানুহৰ মাজত সজাগতা সৃষ্টিৰ বাবে লৈছে কেতবোৰ প্ৰশংসনীয় পদক্ষেপ।
ধোদৰ আলিয়েদি অহা-যোৱা কৰা প্ৰতিগৰাকী মাস্ক নিপিন্ধা লোকলৈ আগবঢ়াইছে একোখন মাস্ক আৰু মানৱ জাতিৰ ধ্বংসৰ কাৰণ হৈ পৰা কৰ’নাৰ যুদ্ধখনত একত্ৰিত হৈ যুঁজিবলৈ জনাইছে কাতৰ আহ্বান।