কাজিৰঙাৰ ৰাষ্ট্ৰীয় উদ্যানৰ পানপুৰ এলেকাক পৰ্যটকৰ বাবে মুকলি কৰিলে বিধায়ক পদ্ম হাজৰিকাই

কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ বিভিন্ন বনাঞ্চলৰ পিচত আজি ৰাষ্ট্ৰীয় উদ্যানখনৰ বিশ্বনাথ বন সংমণ্ডলৰ পানপুৰ বনাঞ্চল পৰ্যটকৰ বাবে মুকলি কৰা হয়৷

কালি পুৱা চতিয়া সমষ্টিৰ বিধায়ক পদ্ম হাজৰিকাই ফিটা কাটি পানপুৰ বনাঞ্চল আনুষ্ঠানিকভাৱে পৰ্যটকৰ বাবে মুকলি কৰে৷

এই উপলক্ষে আয়োজিত অনুষ্ঠানত বিধায়ক গৰাকীৰ উপৰিও শোনিতপুৰ আৰু বিশ্বনাথ জিলাৰ উপায়ুক্ত মানবেন্দ্ৰ প্ৰতাপ সিং আৰু প্ৰনৱ কুমাৰ শৰ্মা,  গোৰ্খা উন্নয়ন পৰিষদৰ ৰাজ্যিক সদস্য মতি কুমাৰ নেৱাৰ আৰু কাজিৰঙাৰ সঞ্চালক পি শিৱকুমাৰ, নদুৱাৰ,  বিশ্বনাথ বন সংমণ্ডলৰ ডি এফ অ’ মুকুট দাসৰ উপৰিও পাৰিপাৰ্শ্বিক উন্নয়ন সমিতিৰ প্ৰতিনিধিৰ লগতে কহঁৰা আৰু বাগৰিৰ জীপ চাফাৰী সন্থাৰ প্ৰতিনিধিও উপস্থিত থাকে৷

উদ্বোধনৰ পিচতেই পানপুৰত প্ৰৱেশ কৰা পৰ্যটকে অঞ্চলটোত হাতী, গঁড়ৰ, হৰিণৰ জাকৰ লগতে জলচৰ পৰিভ্ৰমীও পক্ষীও দৰ্শন কৰে৷

অনুষ্ঠানতে বিধায়ক পদ্ম হাজৰিকাই কাজিৰঙাৰ কৰ্তৃপক্ষৰহৈ বিশ্বনাথ বন সংমণ্ডলৰ অধীনৰ চাকিঘাট অঞ্চলৰ পাৰিপাৰ্শ্বিক উন্নয়ন সমিতিসমূহক প্ৰথম কিস্তিৰ ২৫ লাখকৈ টকাৰ চেক প্ৰদান কৰে ৷

উল্লেখ যে কোভিড ১৯ ৰ সংক্ৰমনৰ মাজতে ২১ অক্টোবৰৰ পৰা পৰ্যটকৰ বাবে মুকলি হোৱা কাজিৰঙা ৰাষ্ট্ৰীয় উদ্যানত যোৱা এটা মাহত মুঠ ১১,৯৬৮ গৰাকী পৰ্যটকে প্ৰৱেশ কৰি বন্যপ্ৰাণীৰ লগতে নৈশৰ্গিক দৃশ্যও উপভোগ কৰে৷

ইয়াৰে ভিতৰত মুঠ ২৭ গৰাকী বিদেশী পৰ্যটকো থকা বুলি কাজিৰঙাৰ কৰ্তৃপক্ষই জনাইছে৷