প্ৰথম পৰ্যায়ৰ ৫ টা সমষ্টিৰ ভোটদানৰ হাৰ কংগ্ৰেছৰ বাবে উৎসাহজনক : হৰিশ ৰাৱট

‘’অসমৰ প্ৰথম পৰ্যায়ৰ ৫ টা সমষ্টিৰ ভোটদানৰ হাৰ কংগ্ৰেছৰ বাবে উৎসাহজনক।‘’ এই মন্তব্য অসম প্ৰদেশ কংগ্ৰেছৰ তত্বাৱধায়ক হৰিশ ৰাৱটৰ।

শনিবাৰে গুৱাহাটীৰ ৰাজীৱ ভৱনত অনুষ্ঠিত এখন সংবাদমেলত প্ৰদেশ কংগ্ৰেছৰ তত্বাৱধায়ক হৰিশ ৰাৱটে অসমৰ আটাইকেইখন আসনতে কংগ্ৰেছ জয়ী হ’ব বুলি আশা ব্যক্ত কৰে।

ৰাৱটে কয়,”অসমৰ উন্নয়নহীনতা, ৰাজ্যখনৰ প্ৰতি অৱহেলা আৰু নাগৰিকত্ব সংশোধনী বিধেয়কৰ ইছ্যুৰ প্ৰতি লক্ষ্য ৰাখি ৰাইজে ভোট দিছে।”

প্ৰদেশ কংগ্ৰেছৰ তত্বাৱধায়ক গৰাকীয়ে লগতে কয় যে আগন্তুক দুটা পৰ্যায়ত অনুষ্ঠিত হ’বলগীয়া ৯ টা সমষ্টিৰ নিৰ্বাচনতো এই কেইটা ইছ্যুৱে গুৰুত্ব পাব।

“প্ৰধান মন্ত্ৰী নৰেন্দ্ৰ মোদী আৰু মুখ্য মন্ত্ৰী সৰ্বানন্দ সোণোৱালৰ কল্যাণকামী আঁচনিৰ নাম লৈ বিজেপিয়ে ভোট নিবিচৰাটো স্থিৰ কৰি লৈছে। কাৰণ উন্নয়ন মূলক আঁচনিক লৈ বিজেপিয়ে ক’ব পৰা একোৱেই নাই”,-হৰিশ ৰাৱটে কয়।

আনহাতে, বিজেপিয়ে সেনাৰ কৃতিত্বক লৈ ভোট বিচাৰিছে বুলি মন্তব্য কৰি ৰাৱটে সেনাকো ৰাজনীতিৰ পেচত সুমুৱাই লোৱাৰ বাবে বিজেপিয়ে চেষ্টা চলোৱাৰ অভিযোগ তোলে।

ইপিনে, বিজেপিৰ শাসনত ধনীক শ্ৰেণীক ধনী কৰাৰ বিপৰীতে দৰিদ্ৰ সীমাৰেখাৰ তলৰ লোকসকল অধিক দৰিদ্ৰ হৈ গৈছে বুলিও প্ৰদেশ কংগ্ৰেছৰ তত্বাৱধায়ক গৰাকীয়ে মন্তব্য কৰে।