বিধায়ক আৰু পঞ্চায়তৰ প্ৰতিশ্ৰুতি সাৰ, নাফুক আদৰ্শ গাঁৱৰ বিধ্বস্ত পথে কন্দুৱাইছে ৰাইজক
চৰাইদেউ জিলাৰ মাহমৰা সমষ্টিৰ অন্তৰ্গত লাকুৱা উন্নয়ন খণ্ডৰ অভয়পুৰ গাঁও পঞ্চায়তৰ আঠ নম্বৰ ৱাৰ্ডৰ নাফুক আদৰ্শ গাঁৱৰ ৰাইজে এতিয়া যাতায়াতৰ ক্ষেত্ৰত তীব্ৰ হাৰাশাস্তিৰ সন্মুখীন হবলগীয়া হৈছে। গাঁওখনৰ জয়া পথ নামৰ ৰাস্তাটোৰ অৱস্থা বৰ্তমান অতি শোচনীয় হৈ পৰিছে। দীৰ্ঘদিন ধৰি মেৰামতিৰ অভাৱত এই ৰাস্তাটোৰে মানুহ অহা যোৱা কৰাটো প্ৰায় অসম্ভৱ হৈ পৰিছে। বছৰ বছৰ ধৰি এই ভঙা ছিগি যোৱা ৰাস্তাটোৱে সাধাৰণ ৰাইজক বহুত কষ্ট দি আহিছে।
এই অঞ্চলটোত প্ৰায় ত্ৰিছৰ পৰা চল্লিছ ঘৰ পৰিয়ালে বসবাস কৰে। ৰাস্তাটো বেয়া হোৱাৰ ফলত বিশেষকৈ বিদ্যালয়লৈ যোৱা সৰু সৰু ছাত্ৰ ছাত্ৰীসকল সদায় বহুত অসুবিধাৰ সন্মুখীন হবলগীয়া হৈছে। উপায় নাপায় গাঁৱৰ মানুহে এতিয়া পথাৰৰ আলিয়েদি খোজকাঢ়ি অহা যোৱা কৰিবলগীয়া এক দুখলগা পৰিস্থিতিৰ সৃষ্টি হৈছে। গাঁৱৰ ৰাইজে মিলি নিজৰ ফালৰ পৰাও ৰাস্তাটো অলপ সুচল কৰিবলৈ চেষ্টা কৰিছিল যদিও সেয়া পৰ্যাপ্ত নহোল আৰু ৰাস্তাটোৰ নিৰ্মাণ কাৰ্য আজিলৈকে সম্পূৰ্ণ নহোল।
ৰাইজৰ অভিযোগ অনুসৰি এই ৰাস্তাটো বনাবৰ বাবে গাঁও পঞ্চায়তৰ প্ৰতিনিধিৰ লগতে স্থানীয় বিধায়ককো বহুত বাৰ অনুৰোধ কৰা হৈছিল। নিৰ্বাচনৰ আগতে শাসকীয় দলৰ নেতাসকলে ৰাস্তাটো বনাই দিয়াৰ বহুতো প্ৰতিশ্ৰুতি দিছিল। কিন্তু নিৰ্বাচন শেষ হোৱাৰ পিছত কোনেও ৰাইজৰ দুখৰ খবৰ লবলৈ সময় নাপালে। বৰ্তমান জনপ্ৰতিনিধিৰ এনে অৱহেলাৰ বাবে গাঁৱৰ ৰাইজে তীব্ৰ ক্ষোভ প্ৰকাশ কৰিছে। আগন্তুক দিনত নেতাসকলে এই ৰাস্তাটো মেৰামতি কৰি ৰাইজক যাতায়াতৰ সুবিধা কৰি দিব নে নিদিয়ে সেয়া সময়তহে পৰিস্কাৰ হব।