চৰ্দাৰ পেটেলৰ প্ৰতিমূৰ্তি ‘ষ্টেটু অৱ ইউনিটি’ক সুৰক্ষা দিব কেন্দ্ৰীয় সুৰক্ষা বাহিনীৰ ২৭২ গৰাকী জোৱানে
গুজৰাটৰ কেভদিয়াস্থিত চৰ্দাৰ বল্লভ ভাই পেটেলৰ প্ৰতিমূৰ্তি ষ্টেটু অৱ ইউনিটিক কেন্দ্ৰীয় উদ্যোগিক সুৰক্ষা বাহিনী(CISF)য়ে সুৰক্ষা দিব।
ইতিমধ্যে কেন্দ্ৰীয় গৃহ মন্ত্ৰালয়ে এই সংক্ৰান্তীয় প্ৰস্তাৱত অনুমোদন জনাইছে।
বুধবাৰে কেন্দ্ৰীয় অৰ্ধ সামৰিক বাহিনীটোৰ ডিজি ৰাজেশ ৰঞ্জনে জানিবলৈ দি কয় যে, গৃহ মন্ত্ৰালয়ৰ পৰা এই বিষয়ক এখন চিঠি তেওঁৰ কাৰ্যালয়ে লাভ কৰিছে।
উল্লেখ্য যে, দেশৰ সকলো বিমান বন্দৰ আৰু উদ্যোগিক ক্ষেত্ৰসমূহৰ সুৰক্ষাৰ দায়িত্ব কেন্দ্ৰীয় উদ্যোগিক নিৰাপত্তা বাহিনীৰ হাতত ন্যস্ত আছে।
আনকি এই অৰ্ধসামৰিক বাহিনীটোৱে ৰাজধানী দিল্লীৰ গুৰুত্বপূৰ্ণ বিভাগৰ চৰকাৰী ভৱনৰ সুৰক্ষাৰ দায়িত্বও বহন কৰি আছে।
অহা ২৫ আগষ্টৰ পৰা কেন্দ্ৰীয় উদ্যোগিক বাহিনীৰ ২৭২ গৰাকী জোৱান ষ্টেটু অৱ ইউনিটিৰ সুৰক্ষাৰ দায়িত্বত নিয়োজিত হ’ব।
উল্লেখ্য যে, কোভিড মহামাৰীৰ পৰিপ্ৰেক্ষিতত বৰ্তমান ষ্টেটু অৱ ইউনিটিৰ দুৱাৰ দৰ্শনাৰ্থীৰ বাবে বন্ধ হৈ আছে।
দেশত আৰম্ভ হোৱা লকডাউনৰ সময়ৰে পৰা দৰ্শনাৰ্থীৰ বাবে বন্ধ হৈ থকা ষ্টেটু অৱ ইউনিটিৰ দুৱাৰ গুৰজৰাট চৰকাৰে দৰ্শনাৰ্থীৰ বাবে অতি সোনকালে খুলিবলৈ চিন্তা চৰ্চা কৰিছে।
সূত্ৰৰ মতে চিআইএছএফক সুৰক্ষাৰ দায়িত্ব দিয়াৰ পিছতে ২ ছেপ্তেম্বৰৰ পৰা দৰ্শনাৰ্থীৰ বাবে ষ্টেটু অৱ ইউনিটিৰ দুৱাৰ খোলাৰ সম্ভাৱনা আছে।
উল্লেখ্যে যে স্বাধীন ভাৰতৰ প্ৰথমগৰাকী গৃহমন্ত্ৰী চৰ্দাৰ বল্লভভাই পেটেলৰ ১৪৩ সংখ্যক জন্মবাৰ্ষিকীত চৰ্দাৰ পেটেললৈ উছৰ্গা কৰি ষ্টেটু অৱ ইউনিটিক উদ্বোধন কৰা হৈছিল।
১৮২ মিটাৰৰ উচ্চতাৰ এই লৌহ মূৰ্তিটো ৩,০৫০ কোটি টকাৰ ব্যয়েৰে নিৰ্মাণ কৰিছিল গুজৰাট চৰকাৰে।