লাইভ ষ্ট্ৰীমিং চলিলেও বন্ধ থাকিব অডিঅ’, উচ্চতম ন্যায়ালয়ৰ মুখ্য ন্যায়াধীশৰ বিচাৰপীঠত এতিয়াৰে পৰা শুনা নাযাব কথা

লাইভ ভিডিঅ’ ষ্ট্ৰীমিং চলি থাকিব, কিন্তু লাইভ লিংকৰ জৰিয়তে সাধাৰণ ৰাইজ বা সংবাদ মাধ্যমে কোনো শব্দ শুনিবলৈ নাপাব। কাৰণ এতিয়াৰে পৰা অডিঅ’ মিউট বা বন্ধ কৰি ৰখা হ’ব। উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ বিচাৰপীঠত নতুন গোচৰৰ মেনচন অৰ্থাৎ জৰুৰী তালিকাভুক্তি বা দ্ৰুত শুনানীৰ বাবে আৱেদন কৰাৰ সময়ত ভাৰ্চুৱেল ভিডিঅ’ কনফাৰেন্সৰ অডিঅ’ সম্পূৰ্ণৰূপে বন্ধ ৰখাৰ নিৰ্দেশ দিয়া হৈছে।

শীৰ্ষ ন্যায়ালয়ৰ এই নতুন নিৰ্দেশৰ জৰিয়তে মূল বিচাৰ প্ৰক্ৰিয়া আৰু গোচৰৰ জৰুৰী তালিকা নিৰ্ধাৰণৰ প্ৰশাসনিক প্ৰক্ৰিয়াৰ মাজত এক স্পষ্ট সীমাৰেখা টানি দিয়া হৈছে বুলি একাংশ আইন বিশেষজ্ঞই মত প্ৰকাশ কৰিছে। বুধবাৰে মুখ্য ন্যায়াধীশে এই নিৰ্দেশ ঘোষণা কৰি কয় যে জৰুৰী বিষয়সমূহৰ উল্লেখ কৰাটো এটা প্ৰশাসনিক প্ৰক্ৰিয়াহে, ই কোনো বিচাৰ সম্পৰ্কীয় কাৰ্যপ্ৰণালী নহয়। সেয়েহে ইয়াক সংবাদ হিচাপে প্ৰকাশ কৰা উচিত নহয়।

উচ্চতম ন্যায়ালয়ৰ এই নিৰ্দেশৰ ফলত কোনো গোচৰৰ উল্লেখ কৰি জৰুৰী ভিত্তিত শুনানীৰ বাবে অধিবক্তাসকলে কৰা আৱেদন আৰু তাৰ উত্তৰত ন্যায়ালয়ে দিয়া তাৎক্ষণিক মন্তব্য সাধাৰণ মানুহ বা সংবাদ মাধ্যমে আৰু পোনপটীয়াকৈ শুনিবলৈ নাপাব। কেইদিনমান পূৰ্বে মুখ্য ন্যায়াধীশে জানিবলৈ দিছিল যে কোনো গোচৰ জৰুৰী ভিত্তিত তালিকাভুক্ত কৰিবলৈ উল্লেখ কৰাটো সম্পূৰ্ণৰূপে ন্যায়ালয়ৰ প্ৰশাসনিক প্ৰক্ৰিয়াৰ অংশ। ই মূল বিচাৰ প্ৰক্ৰিয়াৰ দৰে নহয়, সেয়েহে সংবাদ মাধ্যমে ন্যায়ালয়ৰ এই প্ৰশাসনিক বা আৱেদন সম্পৰ্কীয় কথাবতৰাবোৰ প্ৰচাৰ কৰা উচিত নহয়।

বুধবাৰৰ নিৰ্দেশিকাৰ জৰিয়তে শীৰ্ষ ন্যায়ালয়ে সেই অৱস্থানকে বাস্তৱত প্ৰয়োগ কৰিলে। উল্লেখ্য যে, যোৱা ২২ জুলাইত প্ৰশ্নকাকত ফাদিলৰ বিৰুদ্ধে হোৱা আন্দোলনত দিল্লী আৰক্ষীৰ আক্ৰমণৰ অভিযোগ তুলি তৰা গোচৰৰ দ্ৰুত শুনানীৰ আৱেদন মুখ্য ন্যায়াধীশৰ বিচাৰপীঠত কৰা হৈছিল। সেই সময়ত মুখ্য ন্যায়াধীশৰ বিচাৰপীঠত জনোৱা হৈছিল যে সেই ঘটনা সম্পৰ্কীয় ভিডিঅ’ চোৱাৰ সময় তেওঁলোকৰ হাতত নাই।