চাহ নে বিহ! অলক্ষিতে বিপদ নমাৰ পূৰ্বেই হওক সাৱধান

সদাব্যস্ত জীৱনত চাহ একাপ বনাই খাবলৈ হয়তো আপুনি এলাহ কৰিব পাৰে। সময় বচাবলৈ বা ৰাতিপুৱা দৌৰাদৌৰিৰ বাবে টি বেগকেই হয়তো আপুনি অধিক উপযোগী বিবেচনা কৰিব পাৰে।

কিয়নো অকমান গৰম পানীত টি বেগটো ডুবাই দিলেই আপোনাৰ চাহ সাজু হৈ উঠে। চাহৰ ৰং উঠাৰ সময়খিনিতে আপোনাৰ চাহ কাপ সাজু হৈ পৰে।

এনে একাপ চাহ খাই আপুনি হয়তো ভাবিবলৈ আহৰিয়েই নাপায় যে আপুনি প্ৰকৃততে চাহ কাপৰ সৈতে কি বিষাক্ত বস্তু সেৱন কৰিলে!

আপোনাৰ যদি এইটো দৈনন্দিন অভ্যাসত পৰিণত হৈছে তেতিয়াহ’লে সাৱধান হওক। টি বেগৰ জৰিতে আপোনাৰ অলক্ষিতে পেটত সোমাইছে বহু প্লাষ্টিক কণা।

কানাডাৰ মন্ট্ৰিল মেকগিল বিশ্ববিদ্যালয়ৰ এদল গৱেষকে প্ৰকাশ কৰা এক প্ৰতিবেদনত কোৱা হৈছে যে গৰম পানীত টি বেগ ডুবালে তাৰ পৰা লাখ লাখ প্লাষ্টিকৰ কণা বাহিৰ হয় যিটো চাহ খাওতে শৰীৰত প্ৰৱেশ কৰে।

গৰম পানীৰ তাপমাত্ৰাত প্লাষ্টিক কণাবোৰ অধিক সক্ৰিয় হৈ পৰে। মেকগিল বিশ্ববিদ্যালয়ৰ গৱেষকসকলে চাৰি ধৰণৰ টি বেগ পৰীক্ষা কৰি চাইছিল। প্ৰতিটো টি বেগতেই তেওঁলোকে প্লাষ্টিকৰ উপস্থিতি বিচাৰি পাইছে।

আমেৰিকাৰ কেমিকেল ছচাইটিৰ প্ৰকাশিত জাৰ্ণেল ‘এনভাইৰনমেন্টেল ছায়েন্স এণ্ড টেকন’লজি’ত গৱেষণাৰ সৱিশেষ প্ৰকাশিত হৈছে।

কিন্তু টি বেগৰ ওপৰত গৱেষণা কৰাৰ আঁৰত আছে এক অন্য কাহিনী।

কেইবছৰ আগতে নিশা কামলৈ যোৱাৰ সময়ত কানাডাৰ এগৰাকী মহিলা নাটালি টুফেনকজিয়ে পথৰ দাঁতিৰ এখন কাফেত একাপ চাহ খাবলৈ লয়। তাত তেওঁক টি বেগৰ সৈতে চাহ কাপ দিয়া হৈছিল।

চাহত সোহা মৰাৰ লগে লগে তেওঁৰ বগা বগা কিছুমান গুৰি ভাহি উঠা চকুত পৰিল। প্ৰথমতে একো ধৰিব নোৱাৰিলেও পেশাত এগৰাকী কেমিকেল ইঞ্জিনিয়াৰ নাটালিয়ে  বুজিব পাৰিল যে সেইবোৰ হৈছে প্লাষ্টিকৰ ক্ষদ্ৰ কণাহে।

ইয়াৰ পাছত তেওঁৰ মনলৈ শংকা আহিল আৰু টি বেগৰ জৰিয়তে আমাৰ শৰীৰত কিমান প্লাষ্টিক প্ৰৱেশ কৰে সেয়া জানিবলৈ আগ্ৰহ জাগিল।

তেওঁ সেই চাহৰ নমুনা সংগ্ৰহ কৰি মেকগিল বিশ্ববিদ্যালয়ৰ লগত যোগাযোগ কৰিলে আৰু গৱেষণা আৰম্ভ কৰিলে। ইয়াতেই পোহৰলৈ আহে চিন্তনীয় বিষয়টো।

জানিব পৰা যায় যে এটা টি বেগত ১১০০ কোটি মাইক্ৰপ্লাষ্টিক আৰু ৩০০ কোটি নেনোপ্লাষ্টিক কণা থাকে। সেয়া খালী চকুৰে দেখা পোৱা নাযায়। মাইক্ৰস্কোপতো আনকি সকলোবোৰৰ অস্তিত্ব ধৰা নপৰে। গতিকে, ইয়াৰ ফলত লুকাই থকা বিপদৰ কথা গম পোৱা নাযায়।

মেকগিল বিশ্ববিদ্যালয়ৰ গৱেষণা প্ৰকাশ পোৱাৰ পাছতে এয়া সকলোৱে জানিব পাৰিলে। গতিকেই সাৱধান, চাহ খালেই টি বেগটো যাতে নলয় তালৈ মন কৰক। অন্যথা বিষাক্ত প্লাষ্টিকে শৰীৰ বিধ্বস্ত কৰিবলৈ সময় নালাগিব।