অসমীয়াৰ বিড়ম্বনা! কা-বিৰোধী গণ আন্দোলনৰ প্ৰথম শ্বহীদ দ্বীপাঞ্জল দাসৰ নাম নাই চৰকাৰী তথ্যত

২০১৯ চনৰ ডিচেম্বৰ মাহ। অসমত নাগৰিকত্ব সংশোধনী আইন বিৰোধী প্ৰৱল গণ আন্দোলন চলিছিল।

১২ ডিচেম্বৰৰ সন্ধিয়া গুাৱাহাটীৰ লাচিত নগৰত সেই CAA বিৰোধী গণ আন্দোলনতেই প্ৰাণ হেৰুৱাইছিল ছয়গাঁৱৰ যুৱক দ্বীপাঞ্জল দাসে।

দ্বীপাঞ্জল দাস হৈছে কা-আন্দোলনৰ প্ৰথমগৰাকী শ্বহীদ। কিন্তু চৰকাৰৰ তথ্যত নাই শ্বহীদ দ্বীপাঞ্জল দাসৰ নাম।

২০১৯ চনৰ ডিচেম্বৰ মাহত নাগৰিকত্ব সংশোধনী আইন বিৰোধী আন্দোলনত গুৱাহাটীত আৰক্ষীৰ গুলিত কিমানজন লোক নিহত আৰু কিমানজন আহত হৈছিল? ১৯ জুলাইত বিধানসভাত এই প্ৰশ্ন উত্থাপন কৰিছিল কংগ্ৰেছ বিধায়ক ৰেকিবুদ্দিন আহমেদে।

ৰেকিবুদ্দিন আহমেদৰ তৰাবিহীন প্ৰশ্নৰ উত্তৰ দিছিল গৃহ বিভাগৰ দায়িত্বত থকা মুখ্য মন্ত্ৰী ড০ হিমন্ত বিশ্ব শৰ্মাই।

চৰকাৰৰ উত্তৰ আছিল গুৱাহাটীত CAA বিৰোধী আন্দোলনত মৃত্যু হৈছিল তিনিজনৰ। তেওঁলোকৰ নাম আছিল ক্ৰমে- ছেম ষ্টেফ’ৰ্ড, ঈশ্বৰ নায়ক আৰু আব্দুল হালিম। পুলিচৰ গুলিত আহত হৈছিল- চানিদুল ইছলাম, আতিকুৰ ৰহমান, ইমতাজ মহম্মদ কাজিম, ৰাজেন মেধি আৰু প্ৰকাশ চাহানী।

কিন্তু আশ্বৰ্যজনকভাবে ক’তো নাম নাই শ্বহীদ দ্বীপাঞ্জল দাসৰ।

গুৱাহাটীৰ ভঙাগড়ত থকা সৈনিক কেন্টিনৰ কৰ্মচাৰী আছিল দ্বীপাঞ্জল দাস। ১২ ডিচেম্বৰত প্ৰৱল গণ আন্দোলনৰ মাজতেই গুলিবিদ্ধ হৈছিল দ্বীপাঞ্জল। গুলিবিদ্ধ অৱস্থাতেই জি এম চি এইচলৈ নিয়া হৈছিল দীপাঞ্জলক। কিন্তু মৃত্যুক আঁকোৱালি লৈছিল যুৱকজনে।

ইতিমধ্য সদৌ অসম ছাত্ৰ সন্থা, কৃষক মুক্তি সংগ্ৰাম সমিতি, ছাত্ৰ সমাজকে ধৰি বিভিন্ন জাতীয় সংগঠনে দ্বীপাঞ্জল দাসক CAA বিৰোধী আন্দোলনৰ শ্বহীদ হিচাপে ঘোষণা কৰিছে।

কিন্তু বিধানসভাত চৰকাৰে দিয়া উত্তৰৰ পাছত স্বাভাৱিকতেই প্ৰশ্ন হৈছে কেনেদৰে মৃত্যুবৰণ কৰিছিল দ্বীপাঞ্জল দাসে? চৰকাৰৰ তথ্যত নাম নাই কিয় দীপাঞ্জল দাসৰ?

পুলিচৰ গুলিত মৃত্যু হোৱা নাছিল নেকি দীপাঞ্জলৰ? পুলিচ-চি আৰ পি নহ’লে কাৰ্ফিউৰ মাজতে দীপাঞ্জলক হত্যা কৰা বন্দুকধাৰী কোন আছিল? এতিয়া এই প্ৰশ্নৰ উত্তৰ কোনে দিব?