এইবোৰ কাৰণেই দিনে দিনে কমি আহিছে আজিৰ প্ৰজন্মৰ দৃষ্টিশক্তি

প্ৰতি বছৰে অক্টোবৰ মাহৰ দ্বিতীয় বৃহস্পতিবাৰে বিশ্ব দৃষ্টি দিৱস পালন কৰা হয়। এই দিৱসৰ মূল উদ্দেশ্য হৈছে দৃষ্টিহীনতা, দৃষ্টিশক্তি আৰু চকুৰ যত্নৰ বিষয়ে বিশ্ববাসীক সজাগ কৰা।

আমাৰ বেছিভাগ মানুহেই দিনটোৰ বেছিভাগ সময় নিজৰ নিজৰ কৰ্মস্থলীত কটায়। ডিজিটেলাইজেচনৰ বাবে আমাৰ বেছিভাগ কাম-কাজ এতিয়া মোবাইল, লেপটপ আৰু পিচিৰ ওপৰত নিৰ্ভৰশীল। 

এই ইলেক্ট্ৰনিকছৰ পৰা এক বিশেষ ধৰণৰ নীলা পোহৰ নিৰ্গত হয়। যিবোৰ আমাৰ চকুৰ বাবে ক্ষতিকাৰক। সেয়ে একেৰাহে দীঘলীয়া সময় এই ডিভাইছ সমূহ ব্যৱহাৰ কৰাতো চকুৰ বাবে ক্ষতিকাৰক। এই ডিভাইছ সমূহ ব্যৱহাৰ কৰোতে প্ৰতি ১৫-২০ মিনিটৰ মূৰে মূৰে স্ক্ৰীণৰ পৰা চকু আঁতৰাই দূৰণিৰ বেলেগ ফালে অলপ সময় চাই কিছু সময়ৰ বাবে চকুহাল মুদি থাকিব লাগে। 

তদুপৰি ঘৰত সৰু ল’ৰা-ছোৱালীৰ পৰা এই যন্ত্ৰবোৰ আঁতৰাই ৰাখিব লাগে। স্মাৰ্টফোন আৰু টেবলেটত গেম খেলাৰ আসক্তি কমাব লাগে। শিশুৱে যাতে প্ৰতিদিনে সুষম আহাৰ গ্ৰহণ কৰে তাৰ প্ৰতি লক্ষ্য ৰাখিব লাগে।

উল্লেখ্য যে আমাৰ দেশত কৰ্মক্ষেত্ৰত চকুৰ সুৰক্ষা ব্যৱস্থা নাই। বিশেষকৈ শ্ৰমিক শ্ৰেণী, যিসকলে কৃষিৰ কাম কৰে, চূণৰ কাম কৰে, বেটাৰীৰ কাম কৰে, ৰাসায়নিক পদাৰ্থৰে কাম কৰে, ৱেল্ডিং, ফাউণ্ড্ৰিৰ কাম কৰে — এই লোকসকল মূলতঃ চকুৰ কৰ্ণিয়াৰ আলচাৰৰ দ্বাৰা আক্ৰান্ত হয়। এনে কামত চকুৰ সুৰক্ষাৰ বাবে প্ৰয়োজন হ’লে বিশেষ চশমা (গগলছ) ব্যৱহাৰ কৰিলে এই ৰোগ নহয়। শ্ৰমিকৰ চকু সুৰক্ষাৰ দায়িত্ব কোম্পানীটোৰ মালিকে গ্ৰহণ কৰা উচিত ।