কৰ’না ভাইৰাছৰ সংহাৰ; কাৰাগাৰৰ পৰা এইখন দেশত মুকলি কৰি দিয়া হ’ল ৫৪,০০০ কাৰাবন্দীক
সমগ্ৰ বিশ্বত ভয়াবহ ৰূপ ধাৰণ কৰা কৰ’না ভাইৰাছৰ প্ৰকোপৰ বাবে ইৰাণে কাৰাগাৰৰ পৰা ৫৪,০০০ কাৰাবন্দীক সাময়িকভাৱে মুকলি কৰি দিছে।
মূলত জনবহুল কাৰাবাসৰ পৰা ওলাই আহি কৰ’না ভাইৰাছৰ সৈতে যুদ্ধ কৰাৰ বাবেই দেশখনে এনেদৰে কাৰাবন্দী সকলক সাময়িকভাৱে মুকলি কৰি দিছে বুলি বিশ্বৰ এখন আগশাৰীৰ সংবাদ মাধ্যমত প্ৰকাশ পাইছে।
কাৰাবন্দী সকলৰ শৰীৰত কৰ’না ভাইৰাছ সংক্ৰমণ সম্বন্ধীয় পৰীক্ষাত ভাইৰাছ বিধৰ কোনোধৰণৰ উপস্থিতি ধৰা নপৰিলে জামিনত মুকলি কৰি দিয়াৰ ব্যৱস্থা কৰা হৈছে।
অৱশ্যে যিসকলৰ কাৰাদণ্ড পাঁচ বছৰতকৈ অধিক সেইসকল বন্দীক মুকলি কৰি দিয়া হোৱা নায়।
উল্লেখযোগ্য যে, সমগ্ৰ বিশ্বত প্ৰায় ৯০,০০০ কৈ অধিক লোক কৰ’না ভাইৰাছৰ সংক্ৰমণত পৰিছে ইয়াৰ ভিতৰত ৩,১১০ গৰাকী লোকৰ এই ভাইৰাছৰ সংক্ৰমণৰ ফলত মৃত্যু হৈছে।
প্ৰথমে চীনত সংহাৰী ৰূপ ধাৰণ কৰা কৰ’না ভাইৰাছৰ সংক্ৰমণ বিগত সপ্তাহত ইৰাণলৈ সম্প্ৰসাৰিত হৈছে আৰু বিগত দুটা সপ্তাহত ইৰাণত কৰ’না ভাইৰাছৰ ফলত ৭৭ গৰাকী লোকে প্ৰাণ হেৰুৱাইছে।