EVM ভঙা বিধায়কক কিদৰে সুৰক্ষা দিলে উচ্চ ন্যায়ালয়ে! উচ্চতম ন্যায়ালয়ৰ ককৰ্থনা…

কিছুদিনৰ পূৰ্বে নিৰ্বাচনৰ সন্মুখত সংঘটিত হৈছিল আশ্চৰ্যজনক কাণ্ড৷ সামাজিক মাধ্যমত বিয়পি পৰা এটা ভিডিঅ’ত এজন ব্যক্তি বুথত প্ৰৱেশ কৰি ইভিএম আৰু ভিভিপিএটি মেচিন ভাঙি পেলোৱা দৃশ্য পৰিলক্ষিত হৈছে। ভিডিঅ’টোৰ সত্যতা পৰীক্ষা কৰা হোৱা নাই যদিও সকলোৱে ব্যক্তিজনক বিধায়ক হিচাপে চিনাক্ত কৰিছে। এনে গুৰুতৰ অভিযোগৰ পাছতো উচ্চ ন্যায়ালয়ে তেওঁক কেনেকৈ অন্তৱৰ্তীকালীন সুৰক্ষাৰে ৰাখিলে সোমবাৰে উচ্চতম ন্যায়ালয়ে এই প্ৰশ্ন উত্থাপন কৰাই নহয়, বৰঞ্চ এই সম্পূৰ্ণ ঘটনাক প্ৰহসন আখ্যা দিছে৷

এই ঘটনাটো অন্ধ্ৰ প্ৰদেশৰ। অভিযোগ ৱাই এছ আৰ কংগ্ৰেছৰ বিধায়ক পি ৰামকৃষ্ণ ৰেড্ডীৰ বিৰুদ্ধে। ছ’চিয়েল মিডিয়াত ভাইৰেল হোৱা এটা ভিডিঅ’ ক্লিপিঙত বিধায়ক আৰু তেওঁৰ সহযোগীসকলে ১৩ মে’ত এটা বুথত ইভিএম আৰু ভিভিপিএটি মেচিন টেবুলৰ পৰা তুলি মজিয়াত পেলাই দিয়ে। কিন্তু আৰক্ষীয়ে এফআইআৰত তেওঁৰ নাম লিখা নাছিল। এজাহাৰ দাখিল কৰিছে এজন ‘অচিনাক্ত ব্যক্তি’ৰ নামত। ইয়াৰ পাছতো ৰেড্ডী নিমাত হৈ থাকিল। কিছুদিন পাছত আদালতৰ মজিয়াত ৰেড্ডীয়ে সুৰক্ষা লাভ কৰে।

উচ্চ ন্যায়ালয়ে কি ক’লে?

৫ জুনৰ পুৱা ১০ বজালৈকে ন্যায়াধীশ ভেংকট জ্যোতিৰ্ময়ে বিধায়কগৰাকীক অন্তৱৰ্তীকালীন সুৰক্ষা প্ৰদান কৰে। অৰ্থাৎ তেওঁৰ বিৰুদ্ধে আৰক্ষীয়ে যাতে কোনো ব্যৱস্থা ল’ব নোৱাৰে সেয়া নিশ্চিত কৰা হৈছে। উচ্চ ন্যায়ালয়ৰ এই নিৰ্দেশৰ বিৰোধিতা কৰি বিৰোধী দল টিডিপিৰ ভোটগ্ৰহণকাৰী নামবুধৰি নাথগিৰি ৰাৱে উচ্চতম ন্যায়ালয়ৰ কাষ চাপিছিল। গণনাৰ সময়ছোৱাতো এই কাণ্ডৰ পুনৰাবৃত্তি হ’ব পাৰে বুলি তেওঁ আশংকা প্ৰকাশ কৰে।

উচ্চতম ন্যায়ালয়ত ন্যায়াধীশ অৰবিন্দ কুমাৰ আৰু ন্যায়াধীশ সন্দীপ মেহতাৰ ছুটীৰ বিচাৰপীঠে আজি উচ্চ ন্যায়ালয়ৰ নিৰ্দেশ কাৰ্যকৰীভাৱে বাতিল কৰে। উচ্চতম ন্যায়ালয়ৰ নিৰ্দেশ অনুসৰি ​​ভোট গণনাৰ দিনা ৰেড্ডীয়ে কোনো গণনা কেন্দ্ৰলৈ যাব নোৱাৰিব, নতুবা ভোট গণনা কেন্দ্ৰৰ সীমাৰ ভিতৰত থাকিব নোৱাৰিব।

কালিৰ দিনটোত শুনানিৰ সময়ত ৰেড্ডীৰ অধিবক্তাই ক’বলৈ চেষ্টা কৰিছিল, সেই ভিডিঅ’টোত ৰেডীক দেখা পোৱাৰ প্ৰমাণ কি? ভিডিঅ’টোৰ সত্যতাৰ প্ৰমাণ কি? ইয়াৰ পাছত আবেদনকাৰীসকলে দাবী কৰে যে এই ভিডিঅ’টো নিৰ্বাচন আয়োগৰ লাইভ ৱেবকাষ্টৰ পৰা লাভ কৰা হৈছে। ৰেড্ডীৰ অধিবক্তাই এই দাবী মানি ল’ব বিচৰা নাছিল। ইয়াৰ পাছত ন্যায়াধীশসকলে কয় যে অভিযোগটো প্ৰথমতে সত্য বুলি গণ্য কৰা উচিত। এই ভিডিঅ’টো ভুৱা যেন নালাগে বুলিও ন্যায়াধীশ মেহতাই উল্লেখ কৰে।