৩১ মে’ৰ পাছত মন্দিৰ, মছজিদ আৰু গীৰ্জা খোলাৰ অনুমতি দিলে এইখন চৰকাৰে
ক’ৰ’না ভাইৰাছ প্ৰতিৰোধৰ বাবে কেন্দ্ৰীয় চৰকাৰে ৩১ মে’লৈক বৃদ্ধি কৰিছিল লকডাউনৰ ম্যাদ। বিত্তীয় অৱস্থাৰ প্ৰতি লক্ষ্য ৰাখি চতুৰ্থ পৰ্যায়ৰ লকডাউনত বহু পৰিমাণে শিথিলতা আনিছিল যদিও আধ্যাত্মিক স্থান সমূহ খোলাত সম্পূৰ্ণ নিষেধাজ্ঞা আছিল।
৩১ মে’ৰ পাছত কেন্দ্ৰীয় চৰকাৰে দেশৰ আধ্যাত্মিক স্থান সমূহ খোলাৰ নিৰ্দেশ দিয়ে নে নিদিয়ে সেয়া এতিয়াও স্পষ্ট হোৱা নাই যদিও এই সন্দৰ্ভত কৰ্ণাটক চৰকাৰে লৈছে এটা ডাঙৰ সিদ্ধান্ত।
ৰাজ্যখনৰ মুখ্য মন্ত্ৰী বি এছ য়েদিৰুপ্পা চৰকাৰে ৩১ মে’ৰ পিছত ৰাজ্যখনৰ সকলো মন্দিৰ, মছজিদ আৰু গীৰ্জা ঘৰ খোলাৰ সিদ্ধান্ত লৈছে।
ৰাজ্যখনৰ মঠ-মন্দিৰ সমূহ ১ জুনৰ পৰা খুলি দিয়া হ’ব বুলি মঙলবাৰেই ঘোষণা কৰিছিল মন্ত্ৰী শ্ৰীনিবাস পুজাৰীয়ে। এই মন্তব্যৰ পিছতে আজি ৰাজ্যখনৰ মুখ্য মন্ত্ৰীয়ে মন্দিৰৰ লগতে মছজিদ আৰু গীৰ্জা সমূহো খোলা হ’ব বুলি ঘোষণা কৰে।
উল্লেখ্য যে ২৫ মে’ৰ পৰা দেশজুৰি ৰেইল, বিমান তথা অন্যান্য যান-বাহনৰ চলাচল আ্ৰম্ভ হৈছে। তদুপৰি অতি শীঘ্ৰে হোটেল আদিৰ সেৱাও আৰম্ভ হ’ব। সেয়ে বিভিন্ন লোকে মন্দিৰ খোলাৰ দাবী জনাইছিল।
মন্ত্ৰী গৰাকীয়ে লগতে কয় যে মন্দিৰ কেৱল দৈনিক পূজা-সংস্কাৰৰ বাবেহে খোলা হ’ব, ভিতৰত অন্যান্য কাৰ্যসূচীৰ বাবে অনুমতি প্ৰদান কৰা হোৱা নাই।