এইবাৰ নিৰ্বাচনত চৰ্চাত আছিল ঝালমুড়ি!  জানো আহক ঘৰতে ঝালমুড়ি তৈয়াৰ কৰাৰ পদ্ধতি

বঙালী সকলৰ দৰে অসমীয়া মানুহৰো প্ৰিয় ঝালমুড়ি। নিৰ্বাচনৰ বতৰত ৰাজনৈতিক তৰ্কই যিদৰে উত্তাপ ‎বঢ়ায়, তেনেদৰে শৰীৰৰ উত্তাপ বঢ়াই ঝালমুড়িয়ে। শেহতীয়াকৈ ঝাৰগ্ৰামত নিৰ্বাচনী প্ৰচাৰৰ মাজতে ‎প্ৰধানমন্ত্ৰীয়ে গাড়ীৰ পৰা নামি ঝালমুড়ি খোৱা দৃশ্যটো সামাজিক মাধ্যমত খুবেই ভাইৰেল হৈছিল। অৱশ্যে ‎কেৱল ৰাস্তাৰ কাষৰ দোকানতে কিয়, ঘৰতে যদি স্বাস্থ্যসন্মতভাৱে কলকাতাৰ সেই বিশেষ সোৱাদ পাব ‎পাৰি তেন্তে কথায়ে নাই। সেয়েহে আজিৰ এই বিশেষ দিনটোৰ বাবে ঝালমুড়িৰ তিনিটা সুন্দৰ ৰেচিপি ‎আগবঢ়োৱা হ’ল।‎

প্ৰথমটো হ’ল ঘৰুৱা ক্লাচিক ঝালমুড়ি যিটো আমাৰ সকলোৰে পৰিচিত। ইয়াৰ বাবে প্ৰথমে এটা ডাঙৰ ‎পাত্ৰত কুটি লোৱা পিঁয়াজ, বিলাহী, কেঁচা জলকীয়া আৰু ধনীয়া পাত লব লাগে। তাৰপাছত তাত সিজোৱা ‎আলুৰ টুকুৰা, ভজা বাদাম আৰু বুট মিহলাই লব লাগে। এতিয়া ক’লা নিমখ, চাট মচলা, নেমুৰ ৰস দি ‎ভালদৰে সানি লৈ শেষত মচমচীয়া মুড়ি আৰু সামান্য সৰিয়হৰ তেল দি দ্ৰুতগতিত মিহলাই পৰিৱেশন ‎কৰিব লাগে। মনত ৰাখিব মুড়ি দিয়াৰ পাছত বেছি দেৰি কৰিব নালাগে নহ’লে মুড়িবোৰ কোমলি যাব ‎পাৰে।

দ্বিতীয়টো পদ্ধতি হ’ল নাৰিকল আৰু মচলাযুক্ত ঝালমুড়ি। পুৰণি কলকাতাৰ ঐতিহ্যবাহী সোৱাদ পাবলৈ ‎এই ৰেচিপিটো অতুলনীয়। ইয়াত ব্যৱহাৰ কৰা নাৰিকলৰ সৰু সৰু টুকুৰাই এক অন্য মাত্ৰা প্ৰদান কৰে। ‎ইয়াৰ বাবে এটা বাটিত পিঁয়াজ, আদা আৰু জলকীয়া কুটি লোৱাৰ লগতে নিমখ, জীৰা গুড়ি আৰু জলকীয়া ‎গুড়ি মিহলাই লব লাগে। তাৰপাছত তাত নাৰিকলৰ টুকুৰা আৰু আলুৰ কিউব দি মিশ্ৰণটো তৈয়াৰ কৰি ‎মুড়ি আৰু সৰিয়হৰ তেল ঢালি দিব লাগে। ‎তৃতীয়টো ৰেচিপি হ’ল নেমু আৰু জলকীয়াৰ ঝালমুড়ি। যিসকলে অলপ বেছি জ্বলা আৰু টেঙা ভাল পায় ‎তেওঁলোকৰ বাবে এইটো আটাইতকৈ উপযুক্ত। ইয়াৰ বাবে কেঁচা জলকীয়া আৰু বিলাহী মিহি কৰি কুটি ‎লব লাগে। তাত ভজা বুট আৰু বাদাম মিহলাই নেমুৰ ৰস দি কিছু সময় তিয়াই থব লাগে। তাৰপাছত ‎নিমখ আৰু মচলা দি ভালদৰে সানি লৈ মুড়ি আৰু সৰিয়হৰ তেল মিহলাই লব লাগে। এনেদৰে ঘৰতে ‎আপুনি কলকাতাৰ শৈলীৰ সোৱাদ লব পাৰিব। চাব যাতে মুড়ি দিয়াৰ লগে লগেই ইয়াক পৰিৱেশন কৰা ‎হয় যাতে ইয়াৰ মচমচীয়া ভাবটো অটুট থাকে।