এইবাৰ চীন সীমান্তত নহয়, পাক সীমান্তৰ এল অ’ চিত পাক সেনাৰ গুলীবৰ্ষণ : দুই জোৱান নিহত
পাক সেনাই অস্ত্ৰবিৰতি উলংঘা কৰি পাক-ভাৰত সীমান্তৰ নিয়ন্ত্ৰণ ৰেখাত পুনৰ গুলীবৰ্ষণ কৰিছে।
যোৱা তিনি দিন ধৰি সীমান্তৰ নিয়ন্ত্ৰণ ৰেখাত পাক সেনাই ছেগা চোৰোকাকৈ গুলী বৰ্ষণ অব্যাহত আছে।
শনিবাৰে নিশা পুঞ্চ জিলাৰ ফেৰভাৰীত পুনৰ গুলী বৰ্ষণ কৰিছিল পাক সেনাই। উক্ত গুলীবৰ্ষণত এজন ভাৰতীয় সেনা জোৱান নিহত হোৱাৰ লগতে তিনিজন সেনা জোৱান গুৰুতৰ ভাৱে আহত হয়।
নিশা পাক সেনাই ভাৰতীয় সেনাৰ ছাউনী আৰু গাঁৱলৈ লক্ষ্য কৰি গুলীচালনাৰ লগতে মৰ্টাৰো বৰ্ষণ কৰে বুলি ভাৰতীয় সেনা সূত্ৰই প্ৰকাশ কৰিছে।
উক্ত গুলীবৰ্ষণত গুৰুতৰভাৱে আহত সেনা জোৱান এজন চিকিৎসালয়লৈ নিয়াৰ পথত জোৱানজনৰ মৃত্যু ঘটে। ইতিমধ্যে আহত সেনা জোৱানকেইজনক চিকিৎসালয়ত ভৰ্তি কৰোৱা হৈছে।
পাক সেনাৰ প্ৰত্যুত্তৰত ভাৰতীয় সেনায়ো পাক সেনাৰ একাধিক ছাউনীলৈ গুলীবৰ্ষণ কৰে বুলি ভাৰতীয় সেনাৰ সূত্ৰত প্ৰকাশ।
পাকসেনাৰ শিবিৰলৈ লক্ষ্য কৰি ভাৰতীয় সেনাই কৰা এই গুলীচালনাত একাধিক পাক সেনা হতাহত হোৱা বুলি প্ৰকাশ কৰিছে ভাৰতীয় সেনা সূত্ৰই।
অৱশ্যে ইছলামাবাদে এই সম্পৰ্কে একো কথা প্ৰকাশ কৰা নাই।
বিগত কিছুদিনৰ পৰা পাক সেনাই প্ৰৰোচিতভাৱে অস্ত্ৰবিৰতিৰ চুক্তি লংঘন কৰি গুলীচালনা কৰি আহিছে।
শুকুৰবাৰে ৰামপুৰা ছেক্টৰত পাক সেনাৰ গুলীত এগৰাকী ৪৮ বৰ্ষীয় মহিলা নিহত হৈছিল। উক্ত গুলীবৰ্ষণত চাৰিটা গৃহৰ লগতে এটা মছজিদ ক্ষতিগ্ৰস্ত হৈছিল।
বৃহস্পতিবাৰেও মেন্ধাৰ ছেক্টৰৰ একাধিক প’ষ্ট আৰু গাঁৱলৈ লক্ষ্য কৰি পাক সেনাই কৰা গুলীবৰ্ষণত এজন সেনা জোৱান নিহত হোৱাৰ উপৰিও স্থানীয় লোক এগৰাকী আহত হৈছিল।
বিগত কিছু দিনৰ পৰা পাক সীমান্তত গুলীবৰ্ষণৰ ঘটনা বৃদ্ধি পোৱাৰ বাবে উপত্যকাটোৰ নিয়ন্ত্ৰণ ৰেখাত উত্তেজনা বৃদ্ধি পাইছে।