এইবাৰ ওৱাইনচপৰ লাইচেন্স দিয়াৰ নামত প্ৰবঞ্চনা : বজালীৰ পাঠশালাত উত্তপ্ত পৰিস্থিতি

সমগ্ৰ ৰাজ্যজুৰি চাঞ্চল্যৰ সৃষ্টি কৰা ষ্টক ট্ৰেডিঙৰ নামত হাজাৰ কোটি টকাৰ লুন্ঠনৰ ঘটনা সংঘটিত হৈ থকাৰ মাজতে পোহৰলৈ আহিছে অন্য এক প্ৰৱঞ্চনাৰ ঘটনা৷

এইবাৰ প্ৰবঞ্চনাৰ বিষয় হৈছে ওৱাইনচপৰ লাইচেন্স দিয়াৰ৷ যাৰ পৰিপ্ৰেক্ষিতত আজি নিশা বজালী জিলা সদৰ পাঠশালাত সৃষ্টি হয় এক উত্তপ্ত পৰিস্থিতিৰ আৰু এই উত্তপ্ত পৰিস্থিতিৰ মাজতে মতিলাল দৈমাৰী নামৰ এজন প্ৰবঞ্চকক ৰাইজে গতালে আৰক্ষীক৷ ঘটনা সন্দৰ্ভত জানিব পৰা অনুসৰি ওৱাইনচপৰ লাইচেন্স দিম বুলি বজালীৰ দক্ষিণ প্ৰান্তৰ বালাপাৰা নিৱাসী তথা সম্প্ৰতি বৰপেটাৰোডত বসবাস কৰা মতিলাল দৈমাৰী নামৰ এগৰাকী ব্যক্তিয়ে পাঠশালাৰ বহুকেইজন ব্যক্তিৰ পৰা লৈছিল লাখে লাখে ধন লোৱাৰ এক গুৰুতৰ অভিযোগ উত্থাপন হৈছে৷

মন্ত্ৰী ৰণজিৎ কুমাৰ দাস আৰু মন্ত্ৰী জয়ন্ত মল্ল বৰুৱাৰ ঘনিষ্ঠ বুলি নিজকে চিনাকী দিছিল মতিলাল দৈমাৰীয়ে l

কিন্তু ৱাইনচপৰ লাইচেন্সৰ কাম নোহোৱাত বহুদিনৰ পৰা পলাই থকা প্ৰৱঞ্চক মতিলাল দৈমাৰীক আজি নিশা পাঠশালা হাইৱে চ’কত স্থানীয় ৰাইজৰ সহযোগত লাখে লাখে টকা দিয়া পৰিয়াল এটাই আৱদ্ধ কৰি পাঠশালা আৰক্ষীক গতাই দিয়ে৷ ঘটনা সংঘটিত হোৱাৰ পাছতে এক উত্তপ্ত পৰিস্থিতিৰ সৃষ্টি হয়৷ ৱাইনচপৰ লাইচেন্সৰ নামত এক শকত পৰিমাণৰ ধন আদায় দিয়া এগৰাকী মহিলাই ৰণচণ্ডী মূৰ্তি ধৰি উত্তপ্ত কৰি তোলে সমগ্ৰ অঞ্চল৷ এতিয়া ঘটনা সন্দৰ্ভত আৰক্ষীয়ে কি ব্যৱস্থা গ্ৰহণ কৰে সেয়া সময়তহে কব পৰা যাব৷