নেপালত সামাজিক মাধ্যমৰ ওপৰত আৰোপ কৰা নিষেধাজ্ঞাৰ বিৰুদ্ধে প্ৰতিবাদ : কাৰ্ফিউ ভাঙি ৰাজপথলৈ ওলাই আহিল হাজাৰ হাজাৰ লোক

কাঠমাণ্ডুৰ স্থানীয় প্ৰশাসনে নেপালৰ সংসদ ভৱন চৌহদকে ধৰি বিভিন্ন ঠাইত সান্ধ্য আইন জাৰি কৰিছে।

নেপালী চৰকাৰে ২৬টা জনপ্ৰিয় ছ’চিয়েল মিডিয়া প্লেটফৰ্ম নিষিদ্ধ কৰাৰ পিছতে কলেজীয়া ছাত্ৰ-ছাত্ৰী আৰু যুৱক-যুৱতীসকলে বিক্ষোভ প্ৰদৰ্শন কৰিছে। ইয়াক জেন-জি প্ৰতিবাদ বুলি অভিহিত কৰা হৈছে।

সংসদ ভৱনৰ বাহিৰত প্ৰতিবাদকাৰীসকলে ৰাজনৈতিক দুৰ্নীতিৰ অভিযোগ উত্থাপন কৰি প্ৰতিবাদী সমাৱেশৰ আয়োজন কৰিছিল, তাৰ পিছত প্ৰতিবাদকাৰী আৰু আৰক্ষীৰ মাজত সংঘৰ্ষৰ সৃষ্টি হৈছিল।

তথ্য অনুসৰি পুৱা দেশৰ মূল প্ৰশাসনিক কেন্দ্ৰৰ সমীপৰ মৈতিঘৰত সমবেত হৈ প্ৰতিবাদকাৰীসকলে নিউ বানেশ্বৰত অৱস্থিত সংসদ ভৱনৰ দিশে আগবাঢ়ি যায়।কাঠমাণ্ডু জিলা প্ৰশাসন কাৰ্যালয়ৰ মুখপাত্ৰ মুক্তি ৰাম ৰিজালে কয় যে, “আমি নিশা ১২:৩০ বজাত জাৰি কৰা সান্ধ্য আইন বৃদ্ধি কৰিছো। এতিয়া ৰাষ্ট্ৰপতিৰ বাসগৃহ, শীতল নিৱাছ, নাৰায়ণহিটি দৰবাৰ সংগ্ৰহালয়, প্ৰধানমন্ত্ৰীৰ বাসগৃহ, বালুৱাটাৰ আৰু বানেশ্বৰ সংসদ ভৱনৰ আশে-পাশে থকা অঞ্চলত নিশা ১০ বজালৈকে জাৰি কৰা হৈছে সান্ধ্য আইন।”