গুৱাহাটীত অনুষ্ঠিত হ’ব আই পি এলৰ তিনিখন খেল; ৰাজস্থান ৰোয়েলছে অংশ ল’ব দুখনত

ৰাজ্যৰ ক্ৰিকেট প্ৰেমী সকলৰ বাবে সুখবৰ। ভাৰতৰ জনপ্ৰিয় ক্ৰিকেট লীগ ইণ্ডিয়ান প্ৰিমিয়াৰ লীগ চমুকৈ আই পি এলৰ তিনিখন খেল অনুষ্ঠিত হ’ব গুৱাহাটীৰ বৰ্ষাপাৰা ক্ৰিকেট ষ্টেডিয়ামত।

অসমৰ উদীয়মান ক্ৰিকেটাৰ ৰিয়ান পৰাগে খেলা ৰাজস্থান ৰয়েলছে বৰ্ষাপাৰা ক্ৰিকেট ষ্টেডিয়ামত দুখন খেলত অংশ ল’ব।

আনহাতে, অন্য এখন খেল বেলেগ দলৰ মাজত অনুষ্ঠিত হ’ব।

আই পি এলৰ সূচী ঘোষণা কৰাৰ লগে লগে গুৱাহাটীত অংশ ল’বলগীয়া দল আৰু খেলৰ তাৰিখৰ বিষয়ে জনা যাব।

বুধবাৰে ৰাজস্থান ৰয়েলছৰ সহযোগী স্বত্তাধিকাৰী মনোজ বাদলে অসম ক্ৰিকেট সন্থাৰ সহযোগত বৰ্ষাপাৰা ক্ৰিকেট ষ্টেডিয়ামত এখন সংবাদ মেলত অংশগ্ৰহণ কৰে।

উল্লেখযোগ্য যে, ২২ আগষ্টত ৰাজস্থান ৰয়েলছৰ কৰ্মকৰ্তাসকলে বৰ্ষাপাৰা ক্ৰিকেট ষ্টেডিয়াম পৰিদৰ্শন কৰি সন্তুষ্টি প্ৰকাশ কৰিছিল।

গুৱাহাটীত আই পি এলৰ তিনিখন খেল অনুষ্ঠিত হ’ব বুলি নিশ্চিত হোৱাৰ পাছতে অসমৰ দৰ্শকে আজিংক ৰাহানে,ধোনী, বুমৰাহ, বেন ষ্টোক, বিৰাট কোহলী, ৰোহিত শৰ্মা আদিৰ দৰে তাৰকা খেলুৱৈৰ খেল উপভোগ কৰিব পোৱাৰ সম্ভাৱনা আছে।