দিল্লী মেট্ৰ’ৰ আৱাসিক কলনিত অগ্নিকাণ্ড; একেটা পৰিয়ালৰ ৩ জন সদস্যৰ মৰ্মান্তিক মৃত্যু

দিল্লী মেট্ৰ’ ৰে’ল নিগমৰ ষ্টাফ কোৱাৰ্টাৰত সংঘটিত হৈছে এক ভয়াৱহ অগ্নিকাণ্ড। এই অগ্নিকাণ্ডত একেটা পৰিয়ালৰ তিনিজন সদস্যৰ মৃত্যু হয়। মঙলবাৰে পুৱা ৰাজধানী আদৰ্শ নগৰ অঞ্চলৰ কোৱাৰ্টাৰৰ এটা ফ্লেটত অগ্নিকাণ্ড সংঘটিত হয়। তথ্য লাভ কৰাৰ লগে লগে স্থানীয় আৰক্ষী থানাৰ ছখন অগ্নিনিৰ্বাপক বাহিনীৰ গাড়ী আৰু আৰক্ষীয়ে সেই স্থানত উপস্থিত হয়।

অৱশ্যে হাউছিং কমপ্লেক্সৰ পঞ্চম মহলাত অগ্নিকাণ্ড সংঘটিত হোৱাৰ বাবে জুই নিয়ন্ত্ৰণ কৰিবলৈ উদ্ধাৰকাৰীয়ে বহু কষ্ট কৰিবলগীয়া হয়। বহু চেষ্টাৰ অন্তত অৱশেষত জুই নিৰ্বাপিত কৰিবলৈ সক্ষম হয়।

আৰক্ষী সূত্ৰৰ পৰা জানিব পৰা মতে, নিহতসকলৰ ভিতৰত আছে স্বামী, পত্নী আৰু তেওঁলোকৰ কন্যা। তেওঁলোকৰ নাম ক্ৰমে অজয় ​​(৪২), নীলম (৩৮) আৰু ১০ বছৰীয়া কন্যা জাহ্নৱী। টোপনি থকা সময়তে অগ্নিকাণ্ড সংঘটিত হোৱাৰ বাবে ঘৰৰ পৰা ওলাই যোৱাৰ সুযোগ নোপোৱা বুলি আৰক্ষীয়ে সন্দেহ প্ৰকাশ কৰিছে। জুই নিৰ্বাপিত হোৱাৰ পিছত অতি কৰুণ অৱস্থাত তিনিওজনকে উদ্ধাৰ কৰা হয়। মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰা হৈছে।

পৰিস্থিতি বৰ্তমান নিয়ন্ত্ৰণত আছে যদিও ক’ৰবাত পকেট ফায়াৰ ৰৈছে নেকি তাৰ তদন্ত চলি আছে। কেনেদৰে অগ্নিকাণ্ড সংঘটিত হয় সেয়া এতিয়াও জানিব পৰা হোৱা নাই। ইতিমধ্যে অগ্নিনিৰ্বাপক বাহিনী আৰু আৰক্ষীয়ে তদন্ত আৰম্ভ কৰিছে।

প্ৰাৰম্ভিক তদন্তত অনুমান কৰা গৈছে যে শ্বৰ্ট চাৰ্কিটৰ বাবে ফ্লেটটোত জুইৰ সূত্ৰপাত হ’ব পাৰে। ইতিমধ্যে ফৰেনছিক দলে ঘটনাস্থলীৰ পৰা নমুনা সংগ্ৰহ কৰিছে। একে সময়তে বাসগৃহবোৰৰ অগ্নিনিৰ্বাপক ব্যৱস্থাৰ পৰিস্থিতি চালজাৰি চোৱা হৈছে।