বেংক বিষয়া জুনু শৰ্মাৰ হত্যাকাণ্ডত জড়িত এজন ছালফা সদস্যকে ধৰি তিনিজনক গ্ৰেপ্তাৰ
ভাৰতীয় ষ্টেট বেংকৰ দদৰা শাখাৰ বিষয়া জুনু শৰ্মাৰ হত্যাকাণ্ডৰ তদন্ত কৰি থকা আৰক্ষীয়ে আজি এগৰাকী মহিলাকে ধৰি আৰু তিনিজনক গ্ৰেপ্তাৰ কৰিছে। মহিলাগৰাকীৰ নাম পূজা দাস আৰু আন দুজনৰ নাম ক্ৰমে অৰূপ দাস আৰু অজন্ত কলিতা।
আৰক্ষীৰ সূত্ৰমতে এই তিনিজনক ঘটনাটোত ছুপাৰি কিলাৰ হিচাপে ব্যৱহাৰ কৰা হৈছিল। তিনিওজনকে আজি ভিন্ন ঠাইৰ পৰা গ্ৰেপ্তাৰ কৰে আৰক্ষীয়ে। অৰূপক নলবাৰী জিলাৰ টিহুৰ পৰা, অজন্তক হাজোৰ পৰা আৰু পূজাক কামৰূপ কুলহাটীৰ পৰা গ্ৰেপ্তাৰ কৰে।
“আমি তদন্তটো সম্পূৰ্ণ বিজ্ঞানসন্মত পথেৰে নিব লগীয়া হৈছিল। কিছুমান কাৰণৰ বাবে আমি এওঁলোকক গ্ৰেপ্তাৰৰ বাবে কিছুদিন ৰ’ব লগীয়া হ’ল।” তদন্তকাৰী আৰক্ষী বিষয়াই কয়।
“আদালতত হাজিৰ কৰোৱাৰ পিছত আমি তেওঁলোকক জিম্মাত ল’ম।” বিষয়াজনে কয়।
উল্লেখযোগ্য যে যোৱা ১০ অক্টোবৰত ষ্টেইট বেংক অব ইণ্ডিয়াৰ দদৰা শাখাৰ পৰা নিজৰ ঘৰলৈ আহি থকা অৱস্থাত গুৱাহাটীৰ সীমান্তৱৰ্তী এলেকা আগিয়াথুৰিৰ ৰাজপথত গুলীয়াই হত্যা কৰা হৈছিল বিষয়া জুনু শৰ্মাক।
হত্যাকাণ্ডৰ সৈতে জড়িত থকাৰ অভিযোগত ইতিপূৰ্বে আৰক্ষীয়ে পুতুল আলী, সুনীল কুমাৰ মিশ্ৰ আৰু প্ৰণৱ কলিতা নামৰ তিনিজনক গ্ৰেপ্তাৰ কৰিছিল।