বেইজিঙত কঁপনি: ৬০ বছৰৰ মূৰত প্ৰথমবাৰৰ বাবে হোৱাইট হাউচত ভৰি থলে তিব্বতৰ প্ৰতিনিধিয়ে

অনৱৰতে চীনে হেঁচাৰ মাজত ৰখা তিব্বতৰ নিৰ্বাচিত চৰকাৰৰ প্ৰতিনিধিয়ে সুদীৰ্ঘ ৬০ বছৰৰ অন্তত আমেৰিকাৰ হোৱাইট হাউচত ভৰি থলে।

তিব্বতৰ নিৰ্বাচিত চৰকাৰৰ মুৰব্বী লবচাং ছাংগেই হোৱাইট হাউচত ভৰি থোৱাৰ বিষয়টোকলৈ এতিয়া চিন্তিত হৈ পৰিছে চীনৰ চৰকাৰ।

দশকৰ পিছত দশক ধৰি চীনে স্বাধীনচেতীয়া মনৰ তিব্বতী জনতাৰ ওপৰত চলাই গৈছে অকথ্য নিৰ্যাতন।

চীনৰ এনে নিৰ্যাতনৰ কথা এতিয়া সমগ্ৰ বিশ্বৰ সন্মুখত দিনৰ পোহৰৰ দৰে ফটফটীয়া হৈ পৰিছে। ইয়াৰ মাজতে মাৰ্কিন বিদেশ সচিব মাইক পম্পিঅ’ই তিব্বতী জনতাৰ পক্ষত থিয় দি চীনৰ অত্যাচাৰৰ তীব্ৰ নিন্দা কৰিছে।

চীনৰ বিৰুদ্ধে পম্পিঅ’ৰ বিষোদগাৰৰ পিছতে আজি হোৱাইট হাউচত উপস্থিত হয় তিব্বতৰ স্বাধীনতাকামী জনতাই নিৰ্বাচিত কৰা চৰকাৰৰ মুৰব্বী লবচাং ছাংগেই।

শেহতীয়াকৈ আমেৰিকাই তিব্বতৰ বিষয়টো চোৱাচিতিা কৰাৰ বাবে ৰবাৰ্ট ডেষ্ট্ৰক। ডেষ্ট্ৰ আমন্ত্ৰণতে ভাৰতৰ ধৰমশালাত ৰাজনৈতিক আশ্ৰয় গ্ৰহণ কৰি থকা লবচাং ছাংগেই হোৱাইট হাউচলৈ গৈছে।

হোৱাইট হাউচত লবচাং ছাংগেই ডেষ্ট্ৰৰ সৈতে বৈঠকত মিলিত হোৱা বুলি জানিব পৰা গৈছে।

উল্লেখ্য ২০১১ চনত তিব্বতৰ নিৰ্বাচিত চৰকাৰৰ মুৰব্বী হিচাবে দায়িত্ব গ্ৰহণ কৰাৰ পিছৰে পৰা লবচাং ছাংগেই বিশ্বৰ বিভিন্ন স্থানত মাৰ্কিন প্ৰতিনিধিক সাক্ষাৎ কৰি চীনৰ আগ্ৰাসী মনোভাৱ উদঙাই দি আহিছে।