ৰাজকোটত ইতিহাস সৃষ্টিৰ লক্ষ্যৰে আজি টীম ইণ্ডিয়াৰ সন্মুখত আত্মবিশ্বাসী বাংলাদেশ

ভাৰতৰ মাটিত প্ৰথমবাৰৰ বাবে টি-২০ শৃংখলা দখল কৰাৰ লক্ষ্যৰে আজি ৰাজকোটত সৰ্বশক্তিৰে খেলপথাৰত নামিব আলহী দল বাংলাদেশ।

দিল্লীত অনুষ্ঠিত হোৱা প্ৰথমখন টি-২০ খেলত প্ৰথমবাৰৰ ভাৰতৰ বিৰুদ্ধে জয়ৰ মুখ দেখা বাংলাদেশে আজি ৰাজকোটত শৃংখলা দখলৰ বাবে চেষ্টা কৰিব।

উল্লেখযোগ্য যে, সন্ধিয়া ৭ বজাৰ পৰা অনুষ্ঠিত হ’বলগীয়া খেলখনত ঘূৰ্ণী বতাহ ‘মহা’ই বিধি পথালি দিয়াৰ সম্ভাৱনা আছে।

আনহাতে, শৃংখলাৰ প্ৰথমখন খেলত পৰাস্ত হোৱা ৰোহিত শৰ্মা নেতৃত্বাধীন ভাৰতীয় দলে আজি জয়ৰ ধাৰাৰ মাজলৈ উভতি শৃংখলাত সমতা স্থাপনৰ চেষ্টা চলাব।

বিৰাট কোহলী আৰু বুমৰাহ বিহীন ভাৰতীয় দলটোৱে প্রথমখন খেলত বেটিং আৰু বলিং উভয়তে ভাল প্ৰদৰ্শন দাঙি ধৰাত ব্যৰ্থ হৈছিল।

বেটিঙত অধিনায়ক ৰোহিত শৰ্মা, শ্ৰেয়াৰ আয়াৰ, ঋষভ পণ্ট, শিবম ডুবে, কে এল ৰাহুল ব্যৰ্থ হোৱাৰ বিপৰীতে ধাৱানে কিছু ৰাণ কৰিলেও তেওঁৰ ষ্ট্ৰাইক ৰেট চিন্তাৰ বিষয়।

বলিঙৰ ক্ষেত্ৰত স্পীনাৰ ক্ৰুণাল পাণ্ডেয়া, বেগী বলাৰ খলিল আহমেদ সম্পুৰ্ণৰূপে ব্যৰ্থ হৈছিল।

ক্ৰিকেট অনুৰাগী সকলে আজি ৰাজকোটত ভাৰতীয় দলে ছন্দ ওভতাই পাবলৈ সক্ষম হ’ব বুলি আশা প্ৰকাশ কৰিছে।