আজিহে ঘৰত ভৰি দিবগৈ দৌৰৰাণী হিমাই; আদৰিবলৈ উদগ্ৰীৱ হৈ আছে মাটিৰ মানুহবোৰ

এছিয়ান গেইমছৰ ট্ৰেকত দেশক উজলাই তোলা নৱতম দৌৰৰাণী হিমাই আজিহে নিজৰ গাওঁখন, নিজৰ ঘৰখনত ভৰি থ’বগৈ। এছিয়াডত দপদপাই যোৱা ৭ ছেপ্তেম্বৰতে গুৱাহাটী পালেহি যদিও বিভিন্ন সম্বৰ্ধনা কাৰ্য্যসূচীৰ বাবে হিমাই যোৱাকেইদিন গুৱাহাটীতে থাকিব লগীয়া হৈছে।

ফলত নগাওঁ জিলাৰ কান্ধুলিমাৰিৰ খাটিখোৱা গাওঁৱাসীয়ে এতিয়াও তেওঁলোকৰ মাজৰ পৰা হঠাতে বিশ্ব তাৰকা হোৱা হিমাক ওচৰৰ পৰা অভিনন্দন জনোৱাৰ ইচ্ছা পূৰ হোৱা নাই। হিমাক লৈ ব্যস্ত হোৱাৰ সুযোগ পাইছে কেৱল মহানগৰত থকা প্ৰভাৱশালী শ্ৰেণীটোৱেহে।

আজি হিমাই ৭:৩০ বজাত গুৱাহাটীৰ পৰা নগাওঁ অভিমুখে ৰাওনা হোৱাৰ কথা। হিমাৰ লগতে যাব তেওঁৰ বহুতো গুণমুগ্ধ আৰু সমৰ্থক।

আনহাতে আজি হিমাক বাটে বাটে অভিনন্দন জনাবলৈ সাজু হৈ আছে প্ৰায় ১০০টা দল-সংগঠন। কেইবা ঠাইতো নিৰ্মাণ কৰা হৈছে অভিনন্দন তোৰণ।

নগাৱঁৰ সূত্ৰই জনাইছে যে হিমাক অভিনন্দন জনাবলৈ নগাৱঁৰ নুৰুল আমিন ষ্টেডিয়ামত এটা ৰাজহুৱা কাৰ্য্যসূচী লোৱা হৈছে। থেকেৰাগুৰিৰ পৰাই আছুৱে হিমাক বাইক ৰেলিৰে নগাওঁ চহৰ পৰ্য্যন্ত আগ বঢ়াই নিব বুলি জানিব পৰা গৈছে। দিনৰ প্ৰায় ১১ বজাত নুৰুল আমিন ষ্টেডিয়ামত ৰাজহুৱা সম্বৰ্ধনা অনুষ্ঠানটো অনুষ্ঠিত হ’ব।

ইয়াৰ পিছতে হিমাই বটদ্ৰৱা থানতো সোমাব বুলি জানিব পৰা গৈছে। আজি শ্ৰীমন্ত শংকৰদেৱৰ তিৰোভাৱ (প্ৰয়াণ) তিথি বাবে হিমাই থানত সেৱা কৰিব বুলি সূত্ৰটোৱে জনাইছে।