সফল হ’ল বাংলাদেশ সংৰক্ষণ বিৰোধী আন্দোলন : অসংৰক্ষিত থাকিব চৰকাৰী চাকৰিৰ ৯৭% পদ
তেজ আৰু প্ৰাণৰ বিনিময়ত সফলতা লাভ কৰিলে বাংলাদেশৰ সংৰক্ষণ বিৰোধী আন্দোলনে।
উল্লেখ কৰাৰ প্ৰয়োজন নাই যে ১৯৭১ চনত পাকিস্তানৰ সৈতে স্বাধীনতাৰ যুদ্ধত যুঁজ দিয়া লোকসকলৰ পৰিয়ালৰ বাবে চৰকাৰী চাকৰিৰ ৩০% সংৰক্ষণ ব্যৱস্থা প্ৰণয়ণ কৰিছিল বাংলাদেশ চৰকাৰে। কিন্তু এই সংৰক্ষণ বাতিলৰ বাবে দাবী জনাই বৃহৎ আন্দোলন গঢ়ি তুলিছিল বাংলাদেশৰ ছাত্ৰ-ছাত্ৰী সকলে।
এই আন্দোলনত হাজাৰ হাজাৰ আন্দোলনকাৰী আঘাতপ্ৰাপ্ত হোৱাৰ লগতে প্ৰায় ১৫০ জনতকৈ অধিক আন্দোলনকাৰী নিহত হৈছিল। আজিৰ দিনটোতো পুৱাৰ পৰাই বাংলাদেশৰ বিভিন্ন স্থানত আন্দোলন চলি আছিল।
এই আন্দোলনৰ মাজতে বাংলাদেশৰ শীৰ্ষ ন্যায়ালয়ে আন্দোলনকাৰীৰ দাবী মানি লয়। আদালতৰ ৰায় অনুসৰি এতিয়াৰে পৰা বাতিল হ’ব বাংলাদেশ স্বাধীনতা আন্দোলনৰ মুক্তিযোদ্ধা সকলৰ পৰিয়ালৰ বাবে থকা ৩০ শতাংশ সংৰক্ষণ ব্যৱস্থা।
আদালতৰ ৰায় অনুসৰি, এতিয়াৰে ৯৭% চৰকাৰী চাকৰি সকলোৰে বাবে মুকলি থাকিব। লগতে ৫ শতাংশ চাকৰি মুক্তিযোদ্ধাৰ পৰিয়ালৰ লোকৰ বাবে ১ শতাংশ সংখ্যালঘু আৰু ১ শতাংশ চৰকাৰী চাকৰি ট্ৰান্সজেণ্ডাৰ দিব্যাংগ সকলৰ বাবে সংৰক্ষিত থাকিব।