শিক্ষাৰ পাছত পৰিবহণ; ব্যক্তিগত খণ্ডলৈ সকলো গ’লে চৰকাৰ-মন্ত্ৰীৰ প্ৰয়োজনীয়তা কি?

এফালৰ পৰা হাত দাঙি যোৱা এখন চৰকাৰ! সকলো বিভাগেই কেৱল ব্যক্তিগত খণ্ডক গতোৱাৰ চিন্তা-চৰ্চা!

নামত এখন চৰকাৰ আছে লগতে আছে মন্ত্ৰীগনো। তাৰ পাছত আছে বিভাগীয় বিষয়া-কৰ্মচাৰী!

তথাপিও এফালৰ পৰা ব্যক্তিগত খণ্ডক বিভিন্ন বিভাগবোৰ চিন্তা-চৰ্চা কৰি আছে এইখন বিজেপি চৰকাৰে।

যান-বাহন আইন উলংঘন কৰা বাহনৰ গৰাকীক নাকী লগোৱা বা জৰিমণাৰ নামত শ-শ কোটি টকাৰ ৰাজহ সংগ্ৰহ কৰাত পাকৈত পৰিবহন বিভাগ।

দৈনিক কোটিৰ ঘৰত ৰাজহ সংগ্ৰহ কৰিও যেন ৰাজ্য চৰকাৰৰ পৰিবহন বিভাগটোৱে এতিয়া হাৰ মানিছে।

হাৰ মানি ব্যক্তিগত খণ্ড বা কোনো ব্যক্তিক গতোৱাৰ বাবে চিন্তা চৰ্চা কৰিছে ৰাজ্যৰ পৰিবহন মন্ত্ৰী পৰিমল শুক্লবৈদ্যই।

শুকুৰবাৰে শুক্লবৈদ্যই কয় “আমি চিন্তা চৰ্চা কৰি আছো কোনো ৰাইজ বা ব্যক্তিগত প্ৰতিষ্ঠানক যদি গতাব পাৰো তেন্তে তেওঁলোকৰো লাভ হ’ব বা আমালৈও ৰাজহ আহি থাকিব। সেইটো ব্যৱস্থা কৰিবলৈ চিন্তা চৰ্চা কৰি আছো।”

এটা বিভাগৰ কাম-কাজ কিমান দূৰ্বল হ’লে এনেকুৱা ধৰণৰ মন্তব্য এজন মন্ত্ৰীৰ মুখৰ পৰা ওলাব পাৰে।

যদিহে প্ৰকৃততে ব্যক্তিগত কোনো সংস্থাক বা ব্যক্তি বিশেষে পৰিবহন বিভাগটো গতাব বিচাৰিছে তেন্তে পৰিবহন বোলা দপ্তৰটোৰ প্ৰয়োজনীয়তা কি?

পৰিবহণ মন্ত্ৰীজনৰ কি প্ৰয়োজন?
বিভাগৰ বৰমূৰীয়া বিষয়াসকলৰ কি প্ৰয়োজন?

উল্লেখযোগ্য যে, এই বিভাগটোৱে চমক সৃষ্টিৰ বাবে কাম কৰি অহাৰ উদাহৰণ বহু আছে। তাৰ ভিতৰত ২৫ খন গুলপীয়া বাছ আৰু ২০ খন মাৰ্চিডিজ ব্ৰেঞ্জৰ বাছ ক্ৰয়। কিন্তু সকলো মহানগৰীৰ লগতে ৰাজ্যৰ ৰাজপথৰ পৰা অন্তৰ্ধান হ’ল। ফুটুকাৰ ফেনত পৰিণত হ’ল বয়োজ্যেষ্ঠ লোক, মহিলাৰ বাবে সংৰক্ষিত গুলপীয়া বাছ। ২৫ খন গুলপীয়া বাছ চলাবলৈয়ো সমৰ্থ নাইকিয়া হ’ল ৰাজ্যৰ পৰিবহন বিভাগৰ।

উল্লেখ কৰি থৈছো যে, কিছুদিন পূৰ্বে বিধায়ক তথা প্ৰাক্তন ছাত্ৰ-ছাত্ৰী আৰু ব্যক্তিগত সংস্থাৰ পৰা চৰকাৰী বিদ্যালয়ৰ আন্তঃগাঁথনি উন্নয়নৰ বাবে বা ডেস্ক বেঞ্চ পানী ফিল্টাৰ ক্ৰয় কৰাৰ বাবে আৰ্থিক সহায় বিচাৰি শিক্ষামন্ত্ৰী ৰণোজ পেগুৱে পত্ৰ প্ৰেৰণ কৰিছিল। তাৰ কিছুদিন পাছতেই পৰিবহন মন্ত্ৰীগৰাকীৰ এই মন্তব্যই প্ৰমাণ কৰিছে যে প্ৰকৃততে চৰকাৰখন এটা বিভাগো সুচাৰুৰূপে চলোৱাত সফল নহয়…. একাংশই ক’বলৈ আৰম্ভ কৰিছে… বিভাগসমূহ এটা এটাকৈ লিজত দিয়াতকৈ গোটেই চৰকাৰ খনকে একেবাৰে লিজত দি নিদিয়ে কিয়?