নিউ তিনিচুকীয়াৰ পৰা বগীবিল দলঙৰ ওপৰেৰে পশ্চিম বংগৰ ফৰক্কালৈ মালভৰ্তি ট্ৰেইন

অলপতে নিৰ্মাণ সম্পূৰ্ণ হৈ উঠা আৰু কেৱল আনুষ্ঠানিক উদ্বোধন বাকী থকা বগীবিল দলঙৰ ওপৰেৰে ট্ৰেইনৰ পৰীক্ষামূলক চলাচল আজিও অব্যাহত থাকে। ২ ডিচেম্বৰত দক্ষিণ পাৰৰ ৰঙাপৰা জংছনৰ পৰা তিনিচুকীয়ালৈ ৫০টা পেট্ৰল ভৰ্তি এখন ট্ৰেইন পৰীক্ষামূলকভাৱে সফলতাৰে চলোৱাৰ পিছত আজি তিনিচুকীয়াৰ পৰা উত্তৰ পাৰলৈ বগীবিল দলং পাৰ হয় এখন মালভৰ্তি ট্ৰেইন।

আজি ৫৮টা দবাৰ এখন কয়লাভৰ্তি ট্ৰেইন নিউ তিনিচুকীয়াৰ পৰা বগীবিল দলঙৰ ওপৰেৰে পাৰ হৈ পশ্চিম বংগৰ ফৰক্কা জংছন অভিমুখে যাত্ৰা কৰে বুলি ৰেইলৱেইৰ এজন বিষয়াই জানিবলৈ দিয়ে। ট্ৰেইনখনে পুৱা ৬.৫০ বজাত নিউ তিনিচুকীয়াৰ পৰা যাত্ৰা আৰম্ভ কৰি ৩.৩০ বজাত ৰঙাপৰা পায়।

বিষয়াজনে জানিবলৈ দিয়া মতে, ট্ৰেইনখনৰ মুঠ ওজন ৪৮৯৩.৩০ মেট্ৰিকটন আৰু ইয়াৰে ৩৬০৭.৮ মেট্ৰিকটন হ’ল ল’ড থকা কয়লাৰ ওজন।

উল্লেখযোগ্য যে যোৱা ২২ অক্টোবৰৰ পৰাই নতুন দলংখনৰ ওপৰেৰে ৰেইলৰ পৰীক্ষামূলক চলাচল অব্যাহত আছে। এই বছৰৰ শেষৰ ফালে দলংখন আনুষ্ঠানিকভাৱে উদ্বোধন কৰাৰ আশা আছে। ব্ৰহ্মপুত্ৰ নদীৰ ওপৰত থকা ৪.৯ কিলোমিটাৰ দীঘল দলংখন এই বছৰৰ শেষৰফালে আনুষ্ঠানিকভাৱে উদ্বোধন কৰাৰ সম্ভাৱনা আছে।