ৰাজীৱ গান্ধীৰ প্ৰতিমূৰ্তি ভাঙি লণ্ডভণ্ড; বিজেপি কৰ্মীক তীব্ৰ সমালোচনা ত্ৰিপুৰাৰ কংগ্ৰেছ বিধায়কৰ

ত্ৰিপুৰা কংগ্ৰেছৰ বিধায়ক বীৰাজিৎ সিনহাই দেওবাৰে উনাকোটি জিলাৰ অন্তৰ্গত কৈলাশাহাৰত বিজেপি সমৰ্থিত “গুণ্ডা”ই প্ৰাক্তন প্ৰধানমন্ত্ৰী ৰাজীৱ গান্ধীৰ প্ৰতিমূৰ্তি ভাঙি পেলোৱাৰ অভিযোগ উত্থাপন কৰে।তেওঁ কয় যে কৈলাশাহাৰত ধাৰাবাহিক লণ্ডভণ্ড কাণ্ড সংঘটিত হোৱাৰ ফলত অঞ্চলটোত উত্তেজনা বৃদ্ধি পাইছে।

তেওঁ কয়, “যোৱা ৪ জুনত লোকসভাৰ ভোট গণনাৰ পিছত দুৰ্বৃত্তই ভাৰতীয় কমিউনিষ্ট পাৰ্টি (মাৰ্ক্সবাদী)ৰ দলীয় কাৰ্যালয়ক লক্ষ্য কৰি আক্ৰমণ চলায়। পিছদিনা প্ৰয়াত কবি হিমাদ্ৰী নন্দন দেৱৰ এটা আৱক্ষ মূৰ্তি বিকৃত কৰে। সেইদৰে, ৮ জুনৰ নিশা প্ৰাক্তন প্ৰধানমন্ত্ৰী ৰাজীৱ গান্ধীৰ প্ৰতিমূৰ্তি ভাঙি পেলোৱা হয়।”

তেওঁ কয় যে পশ্চিম গোবিন্দপুৰ অঞ্চলৰ শ্ৰীৰামপুৰ দলঙৰ সমীপত ২০০৯ চনত কৈলাশাহাৰ জিলা কংগ্ৰেছে ৰাজীৱ গান্ধীৰ প্ৰতিমূৰ্তিটো স্থাপন কৰিছিল।

লগতে পঢ়কঃ নতুন মন্ত্ৰীসকলৰ সৈতে নিজ বাসগৃহত প্ৰথমখন বৈঠক আহ্বান প্ৰধানমন্ত্ৰী মোদীৰ; চাওক মন্ত্ৰীবৰ্গৰ সম্পূৰ্ণ তালিকা

সিনহাই লগতে শাসকীয় দলৰ সমৰ্থকসকলে আন্ধাৰৰ সুযোগ লৈ আক্ৰমণৰ কৰাৰ অভিযোগ উত্থাপন কৰি তেওঁলোকক “কাপুৰুষ” বুলি অভিহিত কৰে আৰু সাহস থাকিলে মুকলিকৈ এনে কাম কৰিবলৈ প্ৰত্যাহ্বান জনায়।

আৰক্ষী আৰু প্ৰশাসনিক কৰ্তৃপক্ষৰ পৰা অব্যাহত থকা নিষ্ক্ৰিয়তাই কংগ্ৰেছ দলক ৰাজপথত প্ৰতিবাদ কৰিবলৈ বাধ্য কৰাব পাৰে বুলিও সকীয়াই দিয়ে সিনহাই।