বাজপেয়ীৰ মৃত্যু হৈছে, ঘোষণা ত্ৰিপুৰাৰ ৰাজ্যপাল তথাগত ৰয়ৰ

নতুন দিল্লীৰ এইমছত বৰ্তমান অতি সংকটজনক অৱস্থাত মৃত্যুৰে সৈতে যুঁজি থকা ভাৰতৰ প্ৰাক্তন প্ৰধান মন্ত্ৰী অটল বিহাৰী বাজপেয়ীয়ে চিৰবিদায় লোৱা বুলি ত্ৰিপুৰাৰ ৰাজ্যপাল তথাগত ৰয়ে বুধবাৰে টুইটযোগে কৰা ঘোষণাই দেশজুৰি তীব্ৰ প্ৰতিক্ৰিয়া সৃষ্টি কৰিছে।

যোৱা ১৫ আগষ্টৰ সন্ধিয়া ৭:৫৩ বজাত ৰাজ্যপালজনে বাজপেয়ীৰ ‘মৃত্যু হৈছে। অ’ম শান্তি,’ বুলি এই টুইটটো কৰিছিল।

‘ভাৰতৰ প্ৰাক্তন প্ৰধান মন্ত্ৰী, বাগ্মীবৰ,  ড০ শ্যামাপ্ৰসাদ মুখাৰ্জীৰ ব্যক্তিগত সচিবৰূপে আত্মপ্ৰকাশ কৰি ৬দশক ধৰি ভাৰতৰ ৰাজনৈতিক আকাশৰ এক উজ্জ্বল জ্যোতিষ্কৰূপে পৰিচিত, বুদ্ধিমত্তা, বিনম্ৰতা আৰু ৰসবোধৰ প্ৰতিনিধি অটল বিহাৰী বাজপেয়ীয়ে বিদায় মাগিছে,’ টুইটাৰযোগে ঘোষণা ত্ৰিপুৰাৰ ৰাজ্যপালৰ।

সমগ্ৰ দেশৰ ৰাজনৈতিক নেতাই বিজেপিৰ পিতামহ গৰাকীৰ খবৰ ল’বলৈ চিকিৎসালয়খনত ভিৰ কৰাৰ সময়তে ৰাজ্যপালগৰাকীয়ে কৰা এই ভুৱা ঘোষণাত দেশজুৰি হোৱা বিৰূপ প্ৰতিক্ৰিয়াৰ পিছতে ক্ষমা ভিক্ষা কৰি নিজৰ টুইটটোৰ বাবে ডিলিট কৰিছে ৰাজ্যপালজনে।

‘মই দুঃখিত মই এটা সৰ্বভাৰতীয় টিভি চেনেলৰ বাতৰি অনুসৰি টুইটটো কৰিছিলো। এতিয়ালৈকে কোনো বিভাগীয় ঘোষণা হোৱা নাই। মই মোৰ টুইটটো ডিলিট কৰিছো। পুনৰ ক্ষমা বিচাৰিছো,’ ১৬ আগষ্টত আন এক টুইটযোগে ঘোষণা ৰাজ্যপালগৰাকীৰ।

বিজেপিৰ প্ৰাক্তন নেতা, ৰাজ্যপাল তথাগত ৰয়ে দলৰে পিতামহৰূপে পৰিচিত প্ৰাক্তন প্ৰধান মন্ত্ৰীগৰাকীৰ মৃত্যুৰ নিশ্চিত খবৰ নোহোৱাকৈ এইদৰে চিৰবিদায় দিয়াতো দেশজুৰি ধিকৃত হৈছে।

ৰাজ্যপালগৰাকীয়ে অতীতটো কৰা বিভিন্ন মন্তব্যই দেশজুৰি বিতৰ্কৰ সূত্ৰপাত কৰি আহিছিল।