দেশৰ ভিতৰতে ত্ৰিপুৰাত ক’ৰ’নাৰ পৰা আৰোগ্যৰ হাৰ সৰ্বাধিক : শিক্ষা মন্ত্ৰী ৰতন লাল নাথ
সমগ্ৰ দেশত ক’ৰ’না ভাইৰাছৰ সংক্ৰমণে চৰম ৰূপ লোৱাৰ সময়তে ত্ৰিপুৰাত ক’ৰ’নাৰ পৰা আৰোগ্য লাভৰ হাৰ দেশৰ ভিতৰত সৰ্বাধিক হিচাপে চিহ্নিত হৈছে।
সচিৱালয়ত মঙলবাৰে ত্ৰিপুৰাৰৰ শিক্ষা মন্ত্ৰী ৰতন লাল নাথে সংবাদমেল সম্বোধন কৰি এই দাবী কৰে।
সংবাদমেলত মন্ত্ৰী গৰাকীয়ে ত্ৰিপুৰাত আৰোগ্যৰ হাৰ ৬৮.৬৩ শতাংশ বুলি উল্লেখ কৰে।
ত্ৰিপুৰাত বৰ্তমানলৈ ১৬৮ গৰাকী লোক ক’ৰ’নাত আক্ৰান্ত হোৱাৰ বিপৰীতে ১১৬ গৰাকী লোকে চিকিৎসাৰ অন্তত সম্পুৰ্ণ ৰূপে আৰোগ্য লাভ কৰিছে।
বৰ্তমান ৰাজ্যখনত ৫১ গৰাকী ক’ৰ’না আক্ৰান্ত চিকিৎসাধীন হৈ আছে।
আজিও ৰাজ্যখনত ২৭ গৰাকী ক’ৰ’না আক্ৰান্ত বি এছ এফৰ জোৱান আৰু পৰিয়ালৰ সদস্যক দহ দিনৰ চিকিৎসাৰ অন্তত চিকিৎসালয়ৰ পৰা মুকলি কৰি দিয়া হয়।
সংবাদমেলত ত্ৰিপুৰাৰ শিক্ষা মন্ত্ৰী গৰাকীয়ে বৰ্তমানলৈ ৰাজ্যখনত ১৬,২৬৯ গৰাকী ব্যক্তিৰ শ্বোৱাবৰ নমুনা সংগ্ৰহ কৰি পৰীক্ষা কৰা হৈছে বুলি কয় যি ৰাষ্ট্ৰীয় হাৰতকৈ সৰ্বাধিক।
উল্লেখযোগ্য যে,ত্ৰিপুৰাত ক’ৰ’না আক্ৰান্ত সকলৰ অধিকাংশ বি এছ এফৰ জোৱান আৰু তেওঁলোকৰ পৰিয়ালৰ সদস্য।