ভেনিজুৱেলাত বৃহৎ আক্ৰমণৰ প্ৰস্তুতি? উত্তেজনাৰ মাজতে আকাশমাৰ্গ বন্ধ কৰাৰ নিৰ্দেশ ট্ৰাম্পৰ

ভাবুকি আৰু সতৰ্কবাণীৰ পিছত এতিয়া আমেৰিকাই পোনপটীয়াকৈ ভেনিজুৱেলাক আক্ৰমণ কৰিবলৈ ওলাইছে! শনিবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ এক ঘোষণাই এই জল্পনা-কল্পনাক আৰু অধিক ইন্ধন জগাইছে। ভেনিজুৱেলা আৰু ইয়াৰ আশে-পাশে থকা অঞ্চলসমূহৰ ওপৰত থকা আকাশমাৰ্গ বন্ধ কৰাৰ নিৰ্দেশ দিছে ট্ৰাম্পে।

শনিবাৰে ছ’চিয়েল মিডিয়াত এই তথ্য প্ৰদান কৰে খোদ ৰাষ্ট্ৰপতিগৰাকীয়ে নিজেই। তাৰ পিছতে জল্পনা-কল্পনা বৃদ্ধি পাইছে যে আমেৰিকাই সঁচাকৈয়ে ভেনিজুৱেলাৰ বিৰুদ্ধে পোনপটীয়াকৈ যুদ্ধ কৰিবলৈ ওলাইছে?

আকাশমাৰ্গ বন্ধ কৰাৰ নিৰ্দেশ দি ট্ৰাম্পে ছ’চিয়েল মিডিয়াত লিখিছে, ‘এই বাৰ্তা সকলো বিমান সংস্থা, পাইলট, ড্ৰাগছ সৰবৰাহকাৰী আৰু মানৱ সৰবৰাহকাৰীৰ বাবে। অনুগ্ৰহ কৰি ভেনিজুৱেলা আৰু ইয়াৰ আশে-পাশে থকা অঞ্চলসমূহৰ ওপৰৰ আকাশমাৰ্গ সম্পূৰ্ণৰূপে বন্ধ কৰি দিয়া কথাটো মনত ৰাখিব।’

ট্ৰাম্পৰ বক্তব্যত স্পষ্ট হৈ পৰিছে যে তেওঁ ভেনিজুৱেলাৰ আকাশমাৰ্গৰ ওপৰেৰে কোনো বিমান চলাচল নিবিচাৰে। কিন্তু আমেৰিকাৰ ৰাষ্ট্ৰপতিৰ এনে সতৰ্কবাণীৰ পিছতো এতিয়ালৈকে ভেনিজুৱেলাৰ পৰা কোনো সঁহাৰি পোৱা হোৱা নাই।

আনহাতে, আমেৰিকাৰ প্ৰতিৰক্ষা বিভাগেও এই বিষয়ত কোনো সঁহাৰি দিয়া নাই। ফলত ভেনিজুৱেলাৰ ওপৰত হেঁচা বৃদ্ধিৰ বাবে ট্ৰাম্পে এই কৌশল গ্ৰহণ কৰিছে বুলি ধাৰণা কৰা হৈছে।

মন কৰিবলগীয়া যে ভেনিজুৱেলাৰ ৰাষ্ট্ৰপতি নিকোলাছ মাদুৰো সদায় আমেৰিকাৰ ৰাষ্ট্ৰপতি ড’নাল্ড ট্ৰাম্পৰ লক্ষ্য হৈ আহিছে। দীৰ্ঘদিন ধৰি দুয়োখন দেশৰ মাজত সামৰিক উত্তেজনা অব্যাহত আছে। কেৰিবিয়ান অঞ্চলত আমেৰিকাই বৃহৎ সংখ্যক সৈন্য নিয়োগ কৰিছে। বৰ্তমান তাত ৭খন আমেৰিকাৰ যুদ্ধজাহাজ আৰু এখন পাৰমাণৱিক চাবমেৰিন নিয়োজিত হৈ আছে, য’ত প্ৰায় ৪৫০০ সৈন্য নিয়োজিত হৈ আছে।

ভেনিজুৱেলাৰ ৰাষ্ট্ৰপতি নিকোলাছ মাদুৰোৱে অভিযোগ উত্থাপন কৰিছে যে আমেৰিকাই তেওঁৰ চৰকাৰৰ বিৰুদ্ধে সামৰিক ব্যৱস্থা আৰম্ভ কৰিছে। ট্ৰাম্পৰ পিনে আঙুলিয়াই তেওঁ অভিযোগ কৰে যে, “আমেৰিকাই তেওঁৰ মূৰত বন্দুক ৰাখি দেশখনৰ শাসন ব্যৱস্থা সলনি কৰিবলৈ চেষ্টা কৰিছে।” বিনিময়ত ট্ৰাম্প চৰকাৰে মাদুৰোক ড্ৰাগছ সৰবৰাহকাৰী বুলি ঘোষণা কৰি গ্ৰেপ্তাৰৰ বাবে ৫ কোটি ডলাৰৰ পুৰস্কাৰ ঘোষণা কৰিছে। তেওঁৰ চৰকাৰকো অবৈধ বুলি ঘোষণা কৰা হৈছে।

এনে বিশৃংখলতাৰ মাজতে ড্ৰাগছ সৰবৰাহৰ অভিযোগত ভেনিজুৱেলাৰ নাওত আক্ৰমণ চলাইছে আমেৰিকাৰ সেনাই। ইতিমধ্যে অসংখ্য আক্ৰমণত ৮৩ জন লোকৰ মৃত্যু হৈছে।

ড্ৰাগছ সৰবৰাহৰ সন্দেহত আমেৰিকাৰ সেনাই আক্ৰমণ কৰা জাহাজ আৰু নাওবোৰত ড্ৰাগছ কঢ়িয়াই অনা বুলি কোনো প্ৰমাণ পোৱা যোৱা নাই। যাৰ বাবে ৰাষ্ট্ৰসংঘকে ধৰি বিভিন্ন মানৱ অধিকাৰ সংগঠনে আমেৰিকাৰ এই পদক্ষেপৰ বিৰুদ্ধে সৰৱ হৈছে। অৱশ্যে আমেৰিকাৰ ৰাষ্ট্ৰপতিগৰাকীয়ে তেওঁলোকক বিশেষ গুৰুত্ব দিবলৈ অনিচ্ছুক।

যোৱা শুকুৰবাৰে তেওঁ সকীয়াই দিছিল যে ভেনিজুৱেলাত ড্ৰাগছৰ ব্যৱসায় বন্ধ কৰাৰ বাবে স্থল অভিযান আৰম্ভ কৰা হ’ব। এতিয়া দেশৰ আকাশমাৰ্গ বন্ধ কৰাৰ কথা ঘোষণা কৰিছে ট্ৰাম্পে।