ভাৰতত অবৈধভাৱে প্ৰৱেশ কৰা মহিলাসহ দুই আফ্ৰিকানক গ্ৰেপ্তাৰ কৰিমগঞ্জত : কেনেকৈ প্ৰৱেশ কৰিলে ভাৰতত?
ভাৰতত অবৈধভাৱে প্ৰৱেশ কৰাৰ মহিলাসহ দুগৰাকী দক্ষিণ আফ্ৰিকান নাগৰিকক গ্ৰেপ্তাৰ কৰিছে অসম আৰক্ষীয়ে।
অসম আৰক্ষীৰ সূত্ৰই প্ৰকাশ কৰা মতে ভাৰতত অবৈধভাৱে প্ৰৱেশ কৰা দুগৰাকী আফ্ৰিকান নাগৰিকক অসমৰ কৰিমগঞ্জত গ্ৰেপ্তাৰ কৰা হৈছে।
বিদেশী নাগৰিক দুগৰাকী চুৰাইবাৰীৰ পৰা কৰিমগঞ্জলৈ বাছেৰে গৈ থকা অৱস্থাত কৰিমগঞ্জ আৰক্ষীয়ে গ্ৰেপ্তাৰ কৰে।
গ্ৰেপ্তাৰ হোৱা বিদেশী নাগৰিক দুগৰাকী হৈছে অ’লাডিপুডু অকেনজাক(৪০) আৰু ৰুথাৰেল এণ্ডিছি(২৫)।
বৃহস্পতিবাৰে পুৱা প্ৰায় ৯ বজাত চুৰাইবাৰীৰ পৰা কৰিমগঞ্জলৈ গৈ থকা পথত কৰিমগঞ্জৰ চহৰৰ পৰা প্ৰায় ৫৫ কিলোমিটাৰ দূৰত্বৰত গুৱাহাটী-ত্ৰিপুৰাগামী এএছ-২৫-চিচি৮৬৫৮ নম্বৰ বাছখনৰ পৰা দুয়োকে গ্ৰেপ্তাৰ কৰা হয়।
অ’লাডিপুডুৰ পাছপ’ৰ্ট আছে যদিও সেইখন ছমাহৰ পূৰ্বে ম্যাদ উকলি গৈছে বুলি প্ৰকাশ কৰিছে আৰক্ষীয়ে।
ইফালে ৰুথাৰেল নামৰ আফ্ৰিকান মহিলা গৰাকীৰ পাছপ’ৰ্ট থাকিলেও সেইখন বাংলাদেশৰ পৰা ত্ৰিপুৰা হৈ ভাৰতত প্ৰৱেশ কৰাৰ অনুমতি নাছিল।
“দুয়ো গৰাকী বিদেশীয়ে ভাৰতত অবৈধভাৱে প্ৰৱেশ কৰাৰ বাবে তেওঁলোকক আমি গ্ৰেপ্তাৰ কৰিছো।” এজন আৰক্ষী বিষয়াই সংবাদ মাধ্যমৰ আগত কয়।
আৰক্ষীয়ে প্ৰকাশ কৰা অনুসৰি অ’লাডিপুডু আফ্ৰিকান দেশ ছেনেগালৰ আৰু ৰুথাৰেল কেনিয়াৰ নাগৰিক।
তেওঁলোক কিয় অবৈধভাৱে ভাৰতত প্ৰৱেশ কৰিছে সেয়া জানিব পৰা হোৱা নাই বুলি আৰক্ষীয়ে জনোৱাৰ লগতে কয় যে দুয়োগৰাকীয়ে স্পষ্টভাৱে বাঙালী আৰু হিন্দী ভাষা ক’ব পাৰে।
উল্লেখ্য যে, এসপ্তাহৰ পূৰ্বে চুৰাইবাৰীত আৰক্ষীয়ে আফ্ৰিকান দেশ নাইজেৰিয়াৰ তিনি গৰাকী নাগৰিককো গ্ৰেপ্তাৰ কৰিছিল।