শিহৰণকাৰী পথ দুৰ্ঘটনা : কৰুণ মৃত্যুক সাৱটিলে সেনা বাহিনীৰ দুজন জোৱানে

শোণিতপুৰ জিলাৰ ৰঙাপাৰাত এক গুৰুতৰ দুৰ্ঘটনাত পতিত হৈছে এখন সেনা বাহিনীৰ বাহন। এই ভয়াবহ পথ দুৰ্ঘটনাটোত দুজন জোৱানে থিতাতে মৃত্যুক আকোৱালি লোৱা ঘটনাই সমগ্ৰ অঞ্চলটোতে এক শোকাকূল পৰিবেশৰ সৃষ্টি কৰিছে।

ৰাতিপুৱাই সংঘটিত হোৱা এই দুৰ্ঘটনাটোত আন এজন সেনা জোৱানো আহত হৈছে। গুৰুতৰভাৱে আঘাত প্ৰাপ্ত জোৱানজনক ইতিমধ্যে চিকিৎসালয়ত ভৰ্তি কৰোৱা বুলি জানিব পৰা গৈছে।

কিদৰে দুৰ্ঘটনাটো ঘটিল জানিব পৰা হোৱা নাই যদিও স্থানীয় লোকৰ ধাৰণা অনুসৰি সেনাৰ ট্ৰাকখনে নিয়ন্ত্ৰণ হেৰুওৱাৰ ফলতে এই ভয়ংকৰ দুৰ্ঘটনাটো ঘটে। এই পৰ্যন্ত দুৰ্ঘটনাটোত প্ৰাণ হেৰুওৱা জোৱান দুজন আৰু আঘাতপ্ৰাপ্ত জোৱানজনৰ পৰিচয় জানিব পৰা হোৱা নাই।

ইফালে জানিব পৰা মতে সেনাৰ বাহনখন ফুলবাৰী সেনা শিবিৰৰ পৰা ৰঙাপাৰা অভিমুখে গৈ আছিল।