কাশ্মীৰত লেণ্ডমাইন বিস্ফোৰণত শ্বহীদ দুগৰাকী সেনা; গুৰুতৰভাৱে আহত আন তিনিগৰাকী

কাশ্মীৰৰ নিয়ন্ত্ৰণৰেখাৰ সমীপত শনিবাৰে সংঘটিত এক লেণ্ডমাইন বিস্ফোৰণৰ ঘটনাত দুগৰাকী ভাৰতীয় সেনা শ্বহীদ হয়। নিয়ন্ত্ৰণৰেখাৰ কাষৰ নৌছেৰা-সুন্দৰবনি ছেক্টৰত সংঘটিত হয় এই বিস্ফোৰণৰ ঘটনা।

সেনা বাহিনীৰ এটা দলে অঞ্চলটোত টহল দিয়াৰ সময়ত সংঘটিত হোৱা বিস্ফোৰণত আন তিনিগৰাকী সেনাও গুৰুতৰভাৱে আহত হৈছে।

ঘটনাৰ পাছতে আহত সেনাকেইগৰাকীক ততাতয়াকৈ সেনাৰ হাস্পাতালত ভৰ্তি কৰোৱা হয়। ইয়াৰে দুগৰাকীৰ অৱস্থা সংকটজনক বুলি কোৱা হৈছে।

শ্বহীদ সেনা দুগৰাকীৰ এগৰাকী সেনা বিষয়া আৰু আনগৰাকী সেনা জোৱান আছিল। সেনা বিষয়াগৰাকীৰ নাম লেফটেনেন্ট ঋষি কুমাৰ আৰু সেনা জোৱানগৰাকী হ’ল মনজিৎ সিং। ঋষি কুমাৰ বিহাৰৰ বেগুচৰাই বাসিন্দা আৰু মনজিৎ সিং পঞ্জাৱৰ ভাটিন্দাৰ বাসিন্দা।

বাতৰি অনুসৰি, বিগত তিনি সপ্তাহ ধৰি সেনা বাহিনীয়ে উক্ত অঞ্চলটোত সন্ত্ৰাসবাদীৰ বিৰুদ্ধে তালাচী অভিযান চলাই আছিল।