ৰৌতাৰ সৰ্বহেৰুৱাত ভয়ংকৰ পথ দুৰ্ঘটনাত নিহত দুই চালক, আহত আন দুজন

ওদালগুৰিৰ ৰৌতাৰ সৰ্বহেৰুৱাত এক ভয়ংকৰ পথ দুৰ্ঘটনা সংঘটিত হয়। দুৰ্ঘটনাত থিতাতে নিহত হয় দুই গাড়ী চালক। সৰ্বহেৰুৱাৰ ১৫ নং ৰাষ্ট্ৰীয় ঘাইপথত সংঘটিত হয় এই ভয়ংকৰ দুৰ্ঘটনাটো।

সোমবাৰে পুৱা ৰৌতা অভিমুখী AS-25CC-9639 গেছ ভৰ্তি টেংকাৰ আৰু মঙলদৈ অভিমুখী NL-01K-4223 নম্বৰৰ ট্ৰাকৰ মাজত ভয়ংকৰভাৱে মুখামুখি সংঘৰ্ষ ঘটে।

এই সংঘৰ্ষৰ ফলত বাহন দুখনৰ দুয়োজন চালক থিতাতে নিহত হয়। নিহত চালক দুজন বহু সময়লৈকে গাড়ীতে আবদ্ধ হৈ থাকে।

পিছত লালপুল আৰক্ষী চকীৰ আৰক্ষীৰ দল ঘটনাস্থলীত উপস্থিত হৈ Recovery Vanৰ সহায়ত আৱদ্ধ চালক দুজনক উদ্ধাৰ কৰি মৰণোত্তৰ পৰীক্ষাৰ বাবে ওদালগুৰিলৈ প্ৰেৰণ কৰে।

লগতে পঢ়ক: কলিয়াবৰৰ দেওচুৰত ভয়ংকৰ পথ দুৰ্ঘটনা

নিহত গেছ টেংকাৰখনৰ চালকজন বাক্সা জিলাৰ মুছলপুৰৰ ৰাম বসুমতাৰী আৰু ট্ৰাকখনৰ নিহত চালকজন উত্তৰ প্ৰদেশৰ ৰজিম আলী বুলি আৰক্ষীৰ সূত্ৰই জানিবলৈ দিছে।

আনহাতে, গাড়ী দুখনত থকা হেণ্ডিমেন দুজন সামান্য পৰিমানে আঘাতপ্ৰাপ্ত হয় যদিও সংকটমুক্ত বুলি আৰক্ষীয়ে জানিবলৈ দিয়ে।

স্মৰ্তব্য যে, গেছ ভৰ্তি টেংকাৰখন কোচবিহাৰৰ পৰা দুলীয়াজানলৈ গৈ আছিল। গৈ থকা অৱস্থাতে অনিয়ন্ত্ৰিতভাৱে আহি থকা ট্ৰাকখনে গেছ ভৰ্তি টেংকাৰখনত তীব্ৰ বেগেৰে খুন্দা মাৰে।

টেংক ভৰ্তি গেছৰ বাহনৰ সৈতে খুন্দা মাৰে যদিও সৌভাগ্য ক্ৰমে গেছ বিস্ফোৰিত নোহোৱাত নিশ্চিত বিপদৰ পৰা কোনোমতে ৰক্ষা পৰে বৃহত্তৰ সৰ্বহেৰুৱা অঞ্চল। আৰক্ষীয়েও দুৰ্ঘটনাগ্ৰস্ত গেছ টেংকাৰখন সাৱধানেৰে উদ্ধাৰ কৰি থানালৈ লৈ যায়।