বোকাখাতত দুটা পৃথক পথ দুৰ্ঘটনাত দুজনকৈ লোক নিহত
বোকাখাতত আজি সংঘটিত দুটা পৃথক পথ দুৰ্ঘটনাত দুজন লোকে মৃত্যুক আঁকোৱালি লয়। ইয়াৰে এটা দুৰ্ঘটনা ৰজাবাৰীত আৰু আনটো লখৌজানত সংঘটিত হয়।
আজি পুৱাতে লখৌজানৰ ৩৭ নং ৰাষ্ট্ৰীয় পথত গুৱাহাটীৰ হায়াট চিকিৎসালয়ৰ এখন এম্বুলেঞ্চে অতুল পাল নামৰ এজন পথচাৰীক মহতিয়াই নিয়ে ৷
এম্বুলেঞ্চৰ খুন্দাত পথৰ পৰা দলঙৰ তলত চিটিকি পৰে অতুল পাল। পাচত এম্বুলেঞ্চেৰে আহত অতুল পালক গুৱাহাটীলৈ চিকিৎসাৰ বাবে নিয়া হয় যদিও দুৰ্ভাগ্যবশত আমনিতে পালে শেষ নিঃশ্বাস ত্যাগ কৰে।
আনহাতে দ্বিতীয়তো ঘটনাত ৰূপজ্যোতি বৰা নামৰ যুৱকজনে মটৰচাইকেলেৰে ৰাষ্ট্ৰীয় পথেৰে আহি থকা অৱস্থাত এন এল ০১ কিউ ১৯০৫ নম্বৰৰ এখন গেছ কঢ়িওৱা ট্ৰেংকাৰৰ পিচফালে খুন্দা মাৰি এ এছ ০২ এ চি – ২২৮২ নম্বৰৰ এখন ট্ৰেভেলাৰৰ তলত সোমায়গৈ।
ঘটনা সংঘটিত হোৱাৰ পিছতে ৰূপজ্যোতি বৰাক তাৎক্ষণিকভাৱে বোকাখাত অসামৰিক চিকিৎসালয়লৈ নিয়া হয় যদিও চিকিৎসালয়তে বৰাই শেষ নিশ্বাস ত্যাগ কৰে।
অঞ্চলটোৰ জনপ্ৰিয় যুৱক ৰূপজ্যোতি বৰা ৰজাবাৰীৰে বীৰেন বৰাৰ এক মাত্ৰ পুত্ৰ আছিল।