আচৰিত ঘটনা! অপাৰেচনৰ মাজতে ৰোগী এৰি নাৰ্ছৰ সৈতে যৌনক্ৰিয়াত লিপ্ত চিকিৎসক

ইংলেণ্ডৰ গ্ৰেটাৰ মানচেষ্টাৰৰ টেমছাইড হাস্পতালত সংঘটিত হৈছে এক আচৰিত ঘটনা। চিকিৎসালয়খনত  কনচালটেণ্ট এনাস্থেটিষ্ট হিচাপে কাৰ্যৰত পাকিস্তানী মূলৰ চিকিৎসক ডাঃ সুহাইল আঞ্জুমে এগৰাকী ৰোগীৰ পিত্তথলীৰ অস্ত্ৰোপচাৰৰ সময়ত অচেতন অৱস্থাত থকা ৰোগীক এৰি আন এটা অপাৰেচন কক্ষত নাৰ্ছৰ সৈতে যৌনক্ৰিয়াত লিপ্ত হৈছিল। তেওঁ এগৰাকী নাৰ্ছক ৰোগীৰ ওপৰত চকু ৰাখিবলৈ কৈ “বিশ্ৰামৰ বাবে” বুলি অপাৰেচন কক্ষৰ পৰা ওলাই গৈছিল, কিন্তু প্ৰায় ৮ মিনিট ধৰি আন কক্ষত নাৰ্ছ চিৰ সৈতে আপত্তিজনক অৱস্থাত আন এগৰাকী নাৰ্ছে প্ৰত্যক্ষ কৰি অভিযোগ দাখিল কৰাৰ পিছত সমগ্ৰ ঘটনা পোহৰলৈ আহে।

ডাঃ আঞ্জুমে ব্ৰিটিছ মেডিকেল প্ৰেকটিচনাৰ্ছ ট্ৰিবিউনেল চাৰ্ভিচত স্বীকাৰ কৰিছে যে তেওঁৰ কাৰ্য নিয়মবিৰোধী আৰু লজ্জাজনক আছিল। তেওঁ এই ঘটনাৰ পিছত হাস্পতালৰ চাকৰি এৰি পাকিস্তানলৈ উভতি যায়। শেহতীয়াকৈ তেওঁ পুনৰ ইংলেণ্ডত কাম কৰিবলৈ আবেদন কৰি ক্ষমা বিচাৰিছে, কিন্তু তেওঁৰ এই কুকৰ্মৰ বাবে তেওঁৰ চিকিৎসক হিচাপে কাৰ্য কৰাৰ সামৰ্থ্যৰ ওপৰত প্ৰশ্ন উত্থাপিত হৈছে।

ডাঃ আঞ্জুমে ন্যায়াধিকৰণত কয়, “মই লজ্জাজনক কাম কৰিছো। মই ৰোগী, সহকৰ্মী আৰু হাস্পতালৰ বিশ্বাস ভংগ কৰিছো।” তেওঁৰ সন্তানৰ অকাল জন্ম আৰু পত্নীৰ সৈতে বিচ্ছেদৰ ফলত সৃষ্ট মানসিক চাপৰ বাবেই তেওঁ এই ভুল কৰিছিল বুলি মতপ্ৰকাশ কৰিছে। যদিও ৰোগীৰ কোনো ক্ষতি হোৱা নাছিল, তেওঁৰ এই কাৰ্যই ৰোগীৰ জীৱন বিপদত পেলাব পাৰিলেহেঁতেন। তেওঁ ক্ষমা বিচাৰি কয় যে এনে ভুল আৰু কেতিয়াও নকৰে।