বিশ্বত এইটো প্ৰথম! ব্ৰিটেইনত কেন্সাৰ ৰোগৰ চিকিৎসাৰ বাবে ‘৭ মিনিটৰ বেজী’
ব্ৰিটেইনত কেন্সাৰৰ চিকিৎসাৰ বাবে ৰোগীক দিবলৈ মাত্ৰ সাত মিনিট সময় লাগে তেনে এটা বেজীৰ ব্যৱহাৰ আৰম্ভ হৈছে। ইয়াৰ ফলত কেন্সাৰ চিকিৎসাৰ সময় প্ৰায় তিনি-চতুৰ্থাংশ হ্ৰাস পাব। পৃথিৱীত এনে বেজীৰ এইটো প্ৰথম ব্যৱহাৰ।
যোৱা মঙলবাৰে ব্ৰিটেইনৰ মেডিচিনছ এণ্ড হেল্থকেয়াৰ প্ৰডাক্টছ ৰেগুলেটৰী অথৰিটিয়ে এই বেজীৰ অনুমোদন জনায়।দেশৰ ৰাষ্ট্ৰীয় স্বাস্থ্য সেৱাই বছৰি শ শ কৰ্কট ৰোগীক এই বেজীৰে চিকিৎসা কৰাৰ আশা কৰিছে।
কৰ্কট ৰোগৰ চিকিৎসাৰ এক গুৰুত্বপূৰ্ণ পদ্ধতি হ’ল ইমিউন’থেৰাপি। যিসকলক এই থেৰাপী দিয়া হয় মূলতঃ নতুন বেজীটো তেওঁলোকৰ শৰীৰত প্ৰয়োগ কৰা হ’ব।
লগতে পঢ়ক: সংসদৰ বিশেষ অধিৱেশন আহ্বান মোডী চৰকাৰৰ; হঠাৎ কিয় ৫ দিনীয়া অধিৱেশনৰ পৰিকল্পনা?
এটেজ’লিজুমেব (Tecentric বুলিও পৰিচিত) নামৰ এই বেজীটো ছালৰ তলত দিয়া হ’ব। মূলতঃ ইমিউন’থেৰাপিত শিৰাত বেজীৰ প্ৰদান কৰিবলৈ ৩০ৰ পৰা ৬০ মিনিট সময় লাগে। কেতিয়াবা ৰোগীৰ শিৰা বিচাৰি উলিয়াবলৈ অসুবিধা হয়। কিন্তু এই নতুন বেজীটো মাত্ৰ সাত মিনিটতে দিব পৰা যাব।
ৱেষ্ট ছাফল্ক এন এইচ এছ ফাউণ্ডেশ্যন ট্ৰাষ্টৰ কৰ্কট বিশেষজ্ঞ আলেকজেণ্ডাৰ মাৰ্টিনে কয় যে এই বেজীৰ অনুমোদনে কৰ্কট ৰোগীৰ চিকিৎসাৰ সময় বহু পৰিমাণে হ্ৰাস কৰিব। ফলত চিকিৎসকে এদিনতে বহু ৰোগীৰ চিকিৎসা কৰিব পাৰিব।
লগতে পঢ়ক: শোকাৱহ: আৱাসিক অট্টালিকাৰ বিধ্বংসী অগ্নিকাণ্ডত ৭৩ গৰাকীৰ মৃত্যু
এটেজ’লিজুমেব নামৰ এই বেজী প্ৰস্তুত কৰিছে ৰ’চ প্ৰডাক্টছ লিমিটেডে। প্ৰতিষ্ঠানটোৰ চিকিৎসা সঞ্চালক মাৰিয়াছ শ্ব’লজে কয় যে, “বৰ্তমান কৰ্কট ৰোগীক শিৰাত বেজী দিয়াৰ সময় ৩০ৰ পৰা ৬০ মিনিট, কিন্তু সেইটো এতিয়া ৭ মিনিটলৈ হ্ৰাস হ’ব।”