এক বৃহৎ সিদ্ধান্ত গ্ৰহণ কৰি কেন্দ্ৰৰ নৰেন্দ্ৰ মোডী চৰকাৰে সংসদৰ বিশেষ অধিৱেশন আহ্বান কৰিছে। কেন্দ্ৰীয় সংসদীয় পৰিক্ৰমা মন্ত্ৰী প্ৰহ্লাদ যোশীয়ে কয় যে ১৮ ছেপ্টেম্বৰৰ পৰা ২২ ছেপ্টেম্বৰলৈ সংসদৰ বিশেষ অধিৱেশন চলিব। ৫ দিন ধৰি চলিব এই অধিৱেশন। এইখন হ’ব ১৭ নং লোকসভাৰ ত্ৰয়োদশ অধিৱেশন আৰু ৰাজ্যসভাৰ ২৬১ সংখ্যক অধিৱেশন।
মন্ত্ৰী প্ৰহ্লাদ যোশীয়ে যে অমৃত কালৰ মাজত সংসদৰ বিশেষ অধিৱেশনত অৰ্থপূৰ্ণ আলোচনা আৰু বিতৰ্কৰ আশা কৰা হৈছে। তাৎপৰ্যপূৰ্ণ কথাটো হ’ল, যি সময়ত বিৰোধী মিত্ৰজোঁটৰ তৃতীয়খন বৈঠক মুম্বাইত অনুষ্ঠিত হ’বলৈ গৈ আছে, সেই সময়তে এই অধিৱেশনৰ কথা ঘোষণা কৰা হৈছে।
ৰাজনৈতিক বিশ্লেষকসকলৰ মতে এই অধিবেশনত ১০খনতকৈও অধিক গুৰুত্বপূৰ্ণ বিধেয়ক উত্থাপন কৰা হ’ব। বিধেয়ককেইখনৰ বাবেই বিশেষ অধিৱেশন আহ্বান কৰা হৈছে। অৱশ্যে আন আন জল্পনা-কল্পনাও চলি আছে।
লগতে পঢ়ক: ভাৰতলৈ নাহে জিনপিং! জি-২০ সন্মিলনত মানচিত্ৰ বিতৰ্কৰ প্ৰভাৱ?
বিৰোধীয়ে ইতিমধ্যে অভিযোগ উত্থাপন কৰিছে যে চৰকাৰে সময়ৰ আগতেই নিৰ্বাচন অনুষ্ঠিত কৰিব পাৰে। অৱশ্যে চৰকাৰৰ পৰা এনে কোনো খবৰ চৰ্চালৈ অহা নাই।
ইপিনে, ৩১ আগষ্ট আৰু ১ ছেপ্টেম্বৰত মুম্বাইত ভাৰত মিত্ৰজোঁটৰ এখন বৈঠক অনুষ্ঠিত হৈ আছে। ইয়াৰ পূৰ্বে বিৰোধীয়ে চৰকাৰক আক্ৰমণ অব্যাহত ৰখাৰ বিপৰীতে চৰকাৰেও প্ৰতিশোধ লোৱাৰ লগতে সংসদত বিতৰ্ক নকৰাৰ অভিযোগ উত্থাপন কৰে। তাৰমাজতে এতিয়া এই নতুন ঘোষণা।
উল্লেখ্য যে সংবিধানৰ ৮৫ নং দফাত সংসদৰ অধিৱেশন আহ্বান কৰাৰ ব্যৱস্থা আছে। ইয়াৰ অধীনত সংসদৰ অধিৱেশন আহ্বান কৰাৰ অধিকাৰ আছে চৰকাৰৰ।
ইয়াৰ পূৰ্বে বৰ্ষাকালীন অধিবেশনত যথেষ্ট উত্তাল পৰিস্থিতিৰ সৃষ্টি হৈছিল। সেই অধিৱেশনত তুমুল বিতৰ্কৰ বাবে সংসদৰ দুয়োটা সদনত বহু কাম কৰিব পৰা নগ’ল। ক’বলৈ গ’লে মণিপুৰৰ বিষয়টোৱে এই অধিৱেশনখন নেচেল কৰিলে।
লগতে পঢ়ক: প্ৰশাসনিক পৰিসীমা অক্ষুন্ন ৰখাৰ দাবী; চৰকাৰী সিদ্ধান্তৰ প্ৰতিবাদত নামিল এইবাৰ বৰপেটা সত্ৰ
কেৱল সেয়াই নহয়, সংসদত বিৰোধীয়েও মোডী চৰকাৰৰ বিৰুদ্ধে অনাস্থা প্রস্তাৱ উত্থাপন কৰি ধ্বনি ভোটত পৰাস্ত হয় ৷ এই সময়ত শাসক আৰু বিৰোধী দুয়োপক্ষৰ পৰা ইটোৱে সিটোৰ ওপৰত তীব্ৰ আক্ৰমণ চলোৱা দেখা গৈছিল।
