ইউক্ৰেইনৰ ৰাষ্ট্ৰপতি জেলেনস্কিৰ বিৰুদ্ধে বিস্ফোৰক অভিযোগ প্ৰাক্তন ইউক্ৰেনীয় প্ৰধানমন্ত্ৰীৰ

ইউক্ৰেইনস্থিত ইউৰোপৰ সৰ্ববৃহৎ পাৰমাণৱিক শক্তি প্ৰকল্প আক্ৰমণৰ বাবে ৰাছিয়াক উচতনি দিয়া হৈছিল। আৰু এই উচতনি দিছিল খোদ ইউক্ৰেইন ৰাষ্ট্ৰপতি ভলোডিমি জেলেনস্কিয়ে!

এই বিস্ফোৰক অভিযোগ উত্থাপন কৰিছে ইউক্ৰেইনৰ প্ৰাক্তন প্ৰধানমন্ত্ৰী মাইকোলা আজাৰোভে। মূলত: পশ্চিমীয়া দেশসমূহক ইউক্ৰেইনৰ ওপৰত নো-ফ্লাই জোন স্থাপন কৰিবলৈ সৈমান কৰাৰ বাবেই জাপোৰিজজিয়া পাৰমাণৱিক শক্তি প্ৰকল্পত আক্ৰমণৰ বাবে ৰাছিয়াক উচতনি দিয়া হৈছিল বুলি আজাৰোভে কয়।

আজাৰোভে কয়, “অৱশ্যেই ই এটা ইচ্ছাকৃত উচতনি আছিল। কোনো বুদ্ধিমান ৰাছিয়ান বা ইউক্ৰেইন সৈন্যই কেতিয়াও ইউৰোপৰ সৰ্ববৃহৎ পাৰমাণৱিক শক্তি প্ৰকল্পৰ ভূখণ্ডত এনে ধৰণৰ আক্ৰমণ কৰিবলৈ সাহস নকৰে।”

তেওঁ উল্লেখ কৰে যে প্ৰকল্প কেন্দ্ৰত সামান্য জুয়েও জৰুৰী পৰিস্থিতিৰ সৃষ্টি কৰিব পাৰে।

“সেয়েহে, এয়া সম্পূৰ্ণৰূপে স্পষ্ট যে ই এটা সুবিবেচিত উচতনি আছিল। দ্বিতীয়তে, নিশালৈ জেলেনস্কিৰ তাৎক্ষণিক প্ৰতিক্ৰিয়া আৰু সম্পূৰ্ণ মিছা তথ্যৰ সৈতে আমেৰিকা আৰু ব্ৰিটেইনলৈ তেওঁৰ তাৎক্ষণিক বাৰ্তাই প্ৰমাণ খৰে যে ই স্বাভাৱিকতেই এক প্ৰৰোচনা আছিল।”- তেওঁ লগতে কয়।

এই বিষয়ে জেলেনস্কি অৱগত আছিল আৰু তেওঁ এই প্ৰৰোচনা ব্যৱহাৰ কৰি ইউক্ৰেইনৰ ওপৰত এক নো-ফ্লাই জোন সৃষ্টি কৰিব বিচাৰিছিল বুলি আজাৰোভে অভিযোগ কৰে।

আজাৰোভৰ এই অভিযোগৰ পিছতে এতিয়া সৰ্বত্ৰে তীব্ৰ চৰ্চা হৈছে। অৱশ্যে প্ৰাক্তন প্ৰধানমন্ত্ৰী গৰাকীৰ এই অভিযোগৰ প্ৰতি এতিয়ালৈকে কোনো প্ৰতিক্ৰিয়া প্ৰকাশ কৰা নাই জেলেনস্কিয়ে।