কেঁচা তেজৰ বিনিময়ত থলগিৰি সুৰক্ষাৰ চুক্তি নে পেকেজ ! আলফা(স্বাঃ) সক্ৰিয় হৈ থকা অৱস্থাত শান্তি কিদৰে সম্ভৱ?

দীৰ্ঘদিনীয়া সংগ্ৰাম, দাবী আৰু প্ৰতীক্ষাৰ অন্ত পেলাই যোৱা ২৮ ডিচেম্বৰ তাৰিখে আলোচনাপন্থী আলফা, কেন্দ্ৰ আৰু ৰাজ্য চৰকাৰৰ মাজত স্বাক্ষৰিত হয় এখন ত্ৰিপাক্ষিক শান্তি চুক্তি। এই শান্তি চুক্তিৰ পিছতেই অসমলৈ শান্তি ঘূৰি অহাৰ দাবী কৰিছে চৰকাৰী পক্ষই। আক্ষেপপূৰ্ণভাবে নিজকে সম্বৰণ কৰি আলফা নামৰ আলোচনা পন্থী গোটটো ভংগ কৰা বুলি ঘোষণা কৰিছে গোটটোৰ নেতা সকলে। 

দীৰ্ঘদিনীয়া আলোচনা প্ৰক্ৰিয়াৰ অন্তত চৰকাৰৰ লগত হোৱা এই চুক্তিত কি কি আছে থোৰতে জানি লও আহক – 

১। সমষ্টি পুনৰ নিৰ্ধাৰণৰ অধীনত ৯৪টা সমষ্টিত খিলঞ্জীয়াৰ সুৰক্ষা। ভৱিষ্যতেও সমষ্টি পুনৰ নিৰ্ধাৰণ কালতো বাহাল থাকিব এই নীতি ।

২ । পঞ্চায়ত আৰু নগৰ সমিতিসমূহত অ’ বি চিৰ সংৰক্ষণৰ বিষয়টো পৰীক্ষাৰ বাবে কমিটী গঠন।

৩।  অবৈধ বিদেশীৰ নাম যাতে ভোটাৰ তালিকাত অন্তভুক্ত নহয়, তাৰ বাবে ভোটাৰ পঞ্জীয়ন প্ৰক্ৰিয়াৰ পুনৰীক্ষণ।

৪।  শিক্ষা আৰু নিয়োগৰ সুবিধাৰ বাবে অ’ বি চিসকলৰ শ্ৰেণী বিভাজন কৰি সেইমতে অর্থনৈতিক সংৰক্ষণৰ ব্যৱস্থা কৰিবলৈ এক কমিটী গঠন।

৫।  উচ্চতম ন্যায়ালয়ত বিচাৰাধীন হৈ থকা এন আৰ চিৰ পুনৰীক্ষণ আৰু ন্যায়ালয়ৰ নিৰ্দেশ কাৰ্যকৰীকৰণ।

৬।  অবৈধ অনুপ্ৰৱেশ ৰোধৰ বাবে সীমান্তত সুৰক্ষা আৰু সীমান্ত আৰক্ষীৰ শক্তিশালীকৰণ।

৭। ভূমি সম্পৰ্কীয় তথ্যপাতিসমূহৰ ডিজিটাইজেচন।

৮।  কৃষিভূমিৰ সুৰক্ষা।

৯। চৰকাৰী আৰু বনভূমিৰ বেদখল ৰােধ।

১০। ভূমিৰ গৰাকীৰ ভূমি স্বত্বৰ বাবে বিধেয়কৰ প্ৰস্তাৱ।

১১। বেদখলমুক্ত কৰা ভূমিক লৈ লেণ্ড বেংক স্থাপন আৰু খিলঞ্জীয়া ভূমিহীন পৰিয়ালক ভূমি আবণ্টন দিয়া।

১২। মৃতপ্ৰায় চাহ বাগিচাসমূহৰ বিষয়ে অধ্যয়ন কৰিবলৈ কমিটী গঠন আৰু বাগিচাসমূহ পুনৰুজ্জীৱিতকৰণ।

১৩। স্বাধীনতাৰ আগৰ সাতখন জিলাৰ সংস্কৃতি, ঐতিহ্য, কলা-ভাস্কৰ্য, মিউজিয়াম আদিৰ সুৰক্ষা আৰু তাৰ বাবে কালচাৰেল একাডেমী আৰু গৱেষণা কেন্দ্ৰ স্থাপন।

১৪। অহা পাঁচ বছৰৰ ভিতৰত এক লাখ কোটি টকা বিনিয়োগেৰে ৬০ টাৰো অধিক আন্তঃগাঁথনি উন্নয়ন প্রকল্প স্থাপন।

১৫ । কেন্দ্ৰ-ৰাজ্য চৰকাৰৰ অংশীদাৰিত্বত পাঁচ হেজাৰ কোটি টকাৰ এক বিশেষ পেকেজ। এই পেকেজৰ অধীনত গুৱাহাটীত আই আই এম, আৰ্কিটেকচাৰ বিদ্যালয়, আই আই এছ ই আৰ, ৰে’লৱে যন্ত্ৰ-পাতি উৎপাদন গোটকে ধৰি প্রায় ৩৬ টা উন্নয়ন প্রকল্প ।

১৬ । বান আৰু গৰাখহনীয়া সমস্যাক ৰাষ্ট্ৰীয় অগ্ৰাধিকাৰ।

১৭। চুক্তিখন ৰূপায়ণৰ বিষয়টো পৰ্যবেক্ষণৰ বাবে আলফাৰ প্রতিনিধিক লৈ যৌথ পৰ্যবেক্ষণ কমিটী গঠন।

পিছে এই চুক্তিক লৈ এতিয়া সৰ্বত্ৰে সৃষ্টি হৈছে তীব্ৰ বিতৰ্কৰ। এই চুক্তিয়ে অসমীয়া জাতিয়ে বিচৰা অধিকাৰ, অসমীয়া থলগিৰি মানুহৰ সংস্কৃতি, অৰ্থনীতি আৰু ৰাজনীতিক সুৰক্ষিত কৰাত বিশেষ ভূমিকা পালন নকৰে বুলি দাবী কৰিছে বিভিন্ন মহলে। 

আলফাৰ নেতা মৃণাল হাজৰিকাই এই চুক্তি সম্পৰ্কে কৈছে- “এইটো পৰ্যায়ত যিখিনি হৈছে সেইখিনিতে সন্তুষ্ট থাকিব লাগিব”। লগতে অনুপ চেতিয়াযো প্ৰদান কৰিছে তদ্ৰুপ মন্তব্য। এই কথাৰ পৰা স্পষ্ট তেওঁলোকে আশা কৰা ধৰণে ১০০% সন্তুষ্ট নহয়৷ আলফাই যিমানখিনি কষ্ট-সংগ্ৰাম কৰিলে সেই অনুপাতে যেন বিশেষ একো নাপালে অসমে ! সেই ইংগিত প্ৰদান কৰিয়েই তেওঁলোকে সংবাদ মাধ্যমৰ আগত এক আৱেগিক মন্তব্য ৰখা দেখা গ’ল।

গুৰুত্বপূৰ্ণ কথাটো হল যে এই চুক্তিৰ দ্বাৰা যি অৰ্থনৈতিক পেকেজ বা উন্নয়নমূলক প্ৰকল্পৰ কথা কোৱা হৈছে, সেইখিনি পাবৰ বাবে হাতত অস্ত্ৰ তুলি লৈ বিদ্ৰোহৰ প্ৰয়োজন নাই। সেইখিনি পাবৰ বাবে কেঁচা তেজৰ ফাকু খেলাৰ প্ৰয়োজন নাই। সেইখিনি পাবৰ বাবে এখন চুক্তিৰ প্ৰয়োজন নাই। সেইখিনি পাবৰ বাবে কেন্দ্ৰীয় চৰকাৰৰ সৈতে ১০ বছৰ আলোচনাৰো নাই দৰকাৰ। কিয়নো সেইখিনি উন্নয়নমূলক কাম কৰাটো চৰকাৰৰ দায়িত্ব। আৰু সেইখিনি কাম চৰকাৰে আঁচনি ঘোষণাৰ জৰিয়তেই সম্পাদন কৰিব পাৰে।

মুঠতে ‘অসম চুক্তি”ৰ পৰা আলফাৰ ‘শান্তি চুক্তি’ হোৱালৈকে অসমে প্ৰকৃততে যি বিচাৰি আছিল সেইয়া যেন আজিলৈকে পূৰণ নহল।