হিন্দু বাংলাদেশী সংস্থাপনৰ সমৰ্থনত গণ সমাৱেশ : গুৱাহাটী অৱৰোধৰ হুংকাৰ আলফা নেতা জিতেন দত্তৰ
অসমত হিন্দু বাংলাদেশীক সংস্থাপনৰ সমৰ্থনত ২৭ টা বাঙালী সংগঠনে অহা ১৭ নৱেম্বৰত গুৱাহাটীত আয়োজন কৰা গণ সমাৱেশৰ তীব্ৰ বিৰোধিতা কৰিছে আলপা নেতা জিতেন দত্ত আৰু প্ৰবাল নেওগে।
দেওবাৰে ছচিয়েল মিডিয়াযোগে যিকোনো ধৰণে হিন্দু বাংলাদেশীৰ সমৰ্থনত আয়োজিত গণ সমাৱেশ প্ৰতিৰোধ কৰাৰ হুংকাৰ দিছে আলোচনাপন্থী আলফা নেতা জীতেন দত্ত আৰু প্ৰৱাল নেওগে।
আলফা নেতা জীতেন দত্তই ৮৫৫ জন চহিদৰ কেঁচা তেজক চূড়ান্ত অপমানেৰে জাতিধ্বংসী ষড়যন্ত্ৰত লিপ্ত সকলোকে কঠোৰ সকীয়নি প্ৰদান কৰি ১৭ নৱেম্বৰত গুৱাহাটী মহানগৰ সম্পূৰ্ণৰূপে অৱৰোধ কৰাৰ অংগীকাৰৰ কথা প্ৰকাশ কৰিছে।
আলফা নেতাগৰাকীয়ে প্ৰয়োজন সাপেক্ষে সমগ্ৰ অসম অৱৰোধ কৰাৰো হুংকাৰ দিয়ে। তেওঁ জাতীয় চেতনা থকা প্ৰতিজন অসমীয়াকে এই গণ সমাৱেশ প্ৰতিৰোধ কৰিবৰ বাবে ওলাই আহিবলৈ আহ্বান জনাইছে।
আলফা নেতা জীতেন দত্তই জাতিক ভালপোৱা অসমৰ সকলো জাতি-জনগোষ্ঠীৰ জনসাধাৰণক ১৭ নৱেম্বৰত বৃহৎ গণ প্ৰতিৰোধ কাৰ্যসূচীত অংশগ্ৰহণ কৰিবলৈ আহ্বান জনাইছে।
আনহাতে, আলফা নেতা প্ৰৱাল নেওগে অসমত হিন্দু বাংলাদেশীক সংস্থাপন কৰি জাতি-মাটি-ভেটি উদ্ধাৰৰ কথা কোৱাসকলক ১৭ নৱেম্বৰত মুখামুখি হ’বলৈ হুংকাৰ দিছে।