আলফাৰ পৰা মুক্ত হৈয়ো ঘন অৰণ্যত বাট হেৰুওৱা অপূৰ্ব কাকতী অৱশেষত চাংলাঙত উপস্থিত

জাগুনৰ এটা শিলভঙা উদ্যোগৰ মেনেজাৰ অপূৰ্ব কাকতীক(৩০) কালি আলফা স্বাধীনে মুকলি কৰি দিছিল যদিও আজি পুৱা ভাৰত-ম্যানমাৰ সীমান্তৰ পৰা ঘন জংঘলৰ মাজেৰে খোজ কাঢ়ি আহি থকা অৱস্থাত পুনৰ সন্ধানহীন হোৱাৰ বাতৰি পোৱা গৈছিল যদিও অৱশেষত সোঁশৰীৰে জাগুনত উপস্থিত হৈছেহি।

আজি পুৱা কাকতীয়ে টেলিফোনত আত্মীয়ৰ সৈতে কথা পাতিছিল আৰু আহি আছো বুলি কৈছিল। টেলিফোনিক বাৰ্তালাপৰ সময়ত তেওঁ ৰাস্তাৰ মোৰ পোৱা নাই বুলিও জানিবলৈ দিছিল। টেলিফোনত আত্মীয়সকলে বাটৰ নিৰ্দেশ দি আছিল যদিও হাবিৰ মাজত বেয়া নেটৱৰ্কৰ বাবে সেই যোগাযোগ ছিন্ন হয়। তাৰ পিছতে অপূৰ্ব পুনৰ বহু সময় ধৰি সন্ধানহীন হৈ থাকে।

পুৱাৰ ভাগত অপূৰ্বৰ সৈতে হোৱা টেলিফোনিক বাৰ্তালাপৰ কিয়দংশ তলত দিয়া হ’ল-

      অপূৰ্ব- মই এতিয়া লগেই পোৱা নাই।

     কোন জেগাত আছা গম পোৱা নেকি?

     অপূৰ্ব- লংকাৰ পৰা জখুৱামত নামি আছো।

     গাৱঁৰ মানুহ কাৰোবক লগ পাইছা নেকি?

     অপূৰ্ব- গাৱঁৰ মানুহক লগ পোৱা নাই। মই নামিহে আছো এতিয়া।

     তলত হাতীৰ কেম্প আছে। তালৈ আহি যোৱা তুমি। হাতী কেম্প পাবা।

    অপূৰ্ব- ঠিক আছে।

    তুমি আহি থাকা। তললৈ নামি আহা। তললৈ নামি আছাতো? একেবাৰে ডাউনলৈ আহা।

    ফোনটো কৰি থাকিবা।

    অপূৰ্ব- আপুনি কৰি থাকিবচোন। মোৰ নেটৱৰ্ক নাপায়।

    হাতীৰ কেম্প আছে তাত গম পাইছা নহয়। একেবাৰে ডাউনলৈ নামি আহা।

ইপিনে পৰিয়ালৰ অভিযোগ মতে তেওঁলোকক অসম আৰক্ষী নাইবা অৰুণাচল আৰক্ষীয়ে কোনো প্ৰকাৰৰ সহায় কৰা নাছিল। আনকি সাংবাদিককো অৰুণাচলৰ প্ৰৱেশ কৰিবলৈ দিয়া নাছিল আৰক্ষীয়ে।

কিন্তু তৎসত্ত্বেও বহু কষ্টৰ মূৰত অৱশেষত অৰুণাচলৰ চাংলাং জিলাৰ মানমৌ দলঙৰ কাষত অপূৰ্ব উপস্থিত হৈছেহি।

অপূৰ্বৰ উপস্থিতিৰ বিষয়ে জানিব পাৰি অসম আৰক্ষী আৰু অৰুণাচল আৰক্ষী উক্ত স্থান লৈ ৰাওনা হৈছে।