মাণ্ডোলী কাৰাগাৰত চাঞ্চল্য: কাৰাগাৰৰ ভিতৰতে চিকিৎসকক যৌন উৎপীড়নৰ চেষ্টা বিচাৰাধীন কয়েদীৰ

দিল্লীৰ মাণ্ডোলী কাৰাগাৰত সোমবাৰে সংঘটিত হৈছে এক চাঞ্চল্যকৰ কাণ্ড। কাৰাগাৰত বন্দী হৈ থকা এগৰাকী বিচাৰাধীন কয়েদীয়ে কাৰাগাৰৰ নিয়মীয়া চিকিৎসা পৰীক্ষাৰ সময়ত এগৰাকী মহিলা চিকিৎসকক শাৰীৰিকভাৱে উৎপীড়ন কৰাৰ লগতে ধৰ্ষণৰ প্ৰচেষ্টা চলোৱাৰ অভিযোগ উত্থাপিত হৈছে।

আৰক্ষীয়ে উল্লেখ কৰা মতে অভিযুক্ত কয়েদী গৰাকীয়ে স্বাস্থ্য পৰীক্ষাৰ সময়ত বাথৰুমত লুকাই থাকে আৰু সুযোগ বুজি চিকিৎসক গৰাকীক ধৰ্ষণ কৰিবলৈ চেষ্টা কৰে। কিন্তু চিকিৎসকগৰাকীয়ে কাৰাগাৰৰ এলাৰ্ম বজাই আৰক্ষীক সতৰ্ক কৰি দিয়াৰ লগতে কোনোমতে কয়েদীগৰাকীৰ পৰা নিজকে ৰক্ষা কৰি বাহিৰলৈ দৌৰি ওলাই যাবলৈ সক্ষম হয়।

কাৰাগাৰৰ এগৰাকী জ্যেষ্ঠ আৰক্ষী বিষয়াই জানিবলৈ দিয়া মতে অভিযুক্ত কয়েদীগৰাকীক লগে লগে আটক কৰা হৈছে। ইতিমধ্যে অভিযুক্তৰ বিৰুদ্ধে ভাৰতীয় দণ্ডবিধিৰ ধাৰা ৩৭৬, ৫১১, ৩০৭, ৩৫ আৰু ৫০৬ ৰ অধীনত গোচৰ ৰুজু কৰা হৈছে।

উল্লেখ্য যে অভিযুক্ত কয়েদীগৰাকী মহিলাৰ বিৰুদ্ধে অপৰাধৰ সৈতে জড়িত দুটা গোচৰতে কাৰাবন্দী হৈ আছে। ২০২০ চনত তেওঁৰ বিৰুদ্ধে দাখিল কৰা এক গোচৰত কয়েদীগৰাকী দোষী সাব্যস্ত হৈছিল আৰু তাৰ পাছতেই মাণ্ডোলী কাৰাগাৰত বন্দী হয়।

আনহাতে এই চাঞ্চল্যকৰ ঘটনাৰ পাছত হচকিত হৈ পৰা কাৰাগাৰ কৰ্তৃপক্ষই ভৱিষ্যতে এনে ধৰণৰ যিকোনো ঘটনা প্ৰতিহত কৰিবলৈ বেৰেকৰ চাৰিওফালে নিৰাপত্তা বৃদ্ধি কৰিছে বুলি জানিবলৈ দিয়ে।