গুপ্তহত্যাৰ পুনৰ আগমণ! ইংগিত হ’ব পাৰে ৰেৱতী ফুকনৰ নিৰুদ্দেশ : তৰুণ গগৈ

ৰেৱতী ফুকনৰ নিৰুদ্দেশ অসমত পুনৰ গুপ্তহত্যাৰ আগমণৰ ইংগিত হ’ব পাৰে। ৰাজ্যৰ আইন-শৃংখলা ৰক্ষাত বিজেপি চৰকাৰ সম্পূৰ্ণৰূপে বিফল হোৱা বুলি দাবী কৰি প্ৰাক্তন মুখ্য মন্ত্ৰী তৰুণ গগৈ ( Tarun Gogoi )য়ে আজি ৩ মে’ত সংবাদমেলযোগে এই আশংকা ব্যক্ত কৰিছে।

‘ভাৰত চৰকাৰৰ চোৰাংচোৱা বিভাগ, আৰক্ষী, চৰকাৰ, গৃ্হ বিভাগ’ সকলোৰে সৈতে সম্বন্ধ থকা ৰেৱতী ফুকন এগৰাকী বিশিষ্ট নাগৰিক বুলি উল্লেখ কৰি গগৈয়ে কয় ‘এই মানুহজন আজি সন্ধানহীন হৈ আছে, আমাৰ মুখ্য মন্ত্ৰীয়েও একো নাজানে, ডি জি পিয়েও একো নাজানে।’

যোৱা ২২ এপ্ৰিলৰ পৰা নিৰুদ্দেশ হোৱা ৰেৱতী ফুকনৰ আজিলৈকে শুংসূত্ৰ উলিয়াব নোৱৰাটোৱে চোৰাংচোৱা বিভাগ সম্পূৰ্ণ বিফল হোৱাটোকে প্ৰমাণ কৰিছে বুলিও গগৈয়ে মন্তব্য কৰে।

ৰাজ্যত আলফাৰ সদস্যভৰ্তি, ধনদাবী, এন ডি এফ বি সংবিজিতৰ কাৰ্য্যকলাপ আদি বাঢ়িছে বুলি দাবী কৰি গগৈয়ে প্ৰশ্ন কৰে ‘এইবোৰে আজি কি সংকেত দিছে? লাহে লাহে ২০০১ চনৰ আগলৈ যোৱাৰহে এটা ইংগিত দিছে।’

উল্লেখযোগ্য যে ৰেৱতী ফুকনৰ পুত্ৰ কৌশিক ফুকনে দেউতাকৰ নিৰুদ্দেশ এক ৰাজনৈতিক অপহৰণ বুলি যোৱা শুকুৰবাৰে সংবাদ মাধ্যমত আগত দাবী কৰিছিল।

‘তেওঁক পৰিকল্পিতভাৱে অপহৰণ কৰা হৈছে’ বুলি দাবী কৰি কৌশিক ফুকনে পৰেশ বৰুৱাক আলোচনাৰ মেজলৈ আনিবলৈ ৰেৱতী ফুকনে শেহতীয়াকৈ চলোৱা প্ৰচেষ্টাৰ কথা উল্লেখ কৰিছিল।

পৰেশ বৰুৱা আলোচনাত বহিলে কাৰোবাৰ স্বাৰ্থ বিঘ্নিত হ’ব পাৰে আৰু আলফাৰ নামত চলাই থকা ব্যৱসায়টো বন্ধ হৈ যাব পাৰে ভাবিয়েই সেই শক্তিয়ে দেউতাকক অপহৰণ কৰা বুলি সন্দেহ ব্যক্ত কৰিছিল ৰেৱতী ফুকনৰ পুত্ৰই।

ৰেৱতী ফুকনৰ সন্ধান চলোৱাৰ বাবে মুখ্য মন্ত্ৰী সৰ্বানন্দ সোণোৱালে নিৰ্দেশ দিয়াৰ পিছত অসম আৰক্ষীৰ শীৰ্ষ বিষয়াই ইয়াৰ তদন্ত চলাই থকা বুলি সদৰী কৰিলেও এতিয়ালৈকে তেওঁৰ কোনো শুংসূত্ৰ আৰক্ষীয়ে উলিয়াব পৰা নাই।