অশান্ত মণিপুৰত উপস্থিত হৈয়ে বৈঠকত বহিল অমিত শ্বাহ; পৰিস্থিতি শান্ত কৰাৰ কি মন্ত্ৰ গৃহমন্ত্ৰীৰ?

সোমবাৰে নিশাই অশান্ত মণিপুৰত উপস্থিত হয় কেন্দ্ৰীয় গৃহমন্ত্ৰী অমিত শ্বাহ। ৰাজ্যখনত অশান্তি আৰম্ভ হোৱাৰ পাছত প্ৰথমবাৰৰ বাবে মণিপুৰলৈ আহিছে শ্বাহ। আহি পোৱাৰ পিছতে ৰাজ্যৰ পৰিস্থিতিৰ বিষয়ে মুখ্যমন্ত্ৰী এন বীৰেন সিঙকে ধৰি ৰাজ্যখনৰ গভৰ্নিং কাউন্সিলৰ সৈতে বৈঠকত মিলিত হয় কেন্দ্ৰীয় গৃহমন্ত্ৰীগৰাকীয়ে।

ৰাজ্যৰ আইন-শৃংখলাৰ পৰিস্থিতিৰ বিষয়ে ৰাজ্যখনৰ মুখ্যমন্ত্ৰী, ৰাজ্যপালৰ লগতে গভৰ্নিং কাউন্সিলৰ পৰাও শ্বাহে খা-খবৰ লয়। সূত্ৰসমূহৰ মতে, ৰাজ্যৰ উত্তপ্ত পৰিস্থিতি নিয়ন্ত্ৰণ কৰিবলৈ শ্বাহে মুখ্যমন্ত্ৰীকে ধৰি অন্যান্য বিষয়াসকলক এক ৰূপৰেখাও দাঙি ধৰিছে।

লগতে পঢ়ক: জম্মুৰ কাটৰাত ৭৫জন তীৰ্থযাত্ৰী কঢ়িয়াই নিয়া বাছ দুৰ্ঘটনাগ্ৰস্ত; ১০ জন নিহত, আন কেইবাজনো আহত

অমিত শ্বাহে মেইতি আৰু কুকি জনগোষ্ঠীৰ নেতাকো সাক্ষাৎ কৰাৰ সম্ভাৱনা আছে। গৃহ মন্ত্ৰালয়ৰ এজন বিষয়াই জনায় যে, “জনগোষ্ঠীসমূহক নিৰাপত্তাৰ আশ্বাস দিয়া হ’ব আৰু অস্ত্ৰ-শস্ত্ৰ সম্বৰণ কৰিবলৈ কোৱা হ’ব। যাতে আলোচনাৰ জৰিয়তে সমস্যাসমূহ সমাধানৰ বাবে অনুকূল পৰিৱেশ সৃষ্টি কৰিব পৰা যায়।’

উল্লেখ্য যে কেন্দ্ৰীয় গৃহমন্ত্ৰী অমিত শ্বাহ সোমবাৰে চাৰিদিনীয়া ভ্ৰমণসূচীৰে মণিপুৰলৈ আহিছে। তেওঁৰ লগত আছে গৃহ সচিব অজয় ​​ভাল্লাকে ধৰি কেন্দ্ৰৰ উচ্চপদস্থ বিষয়াসকল। অহা ১ জুনলৈ তেওঁ মণিপুৰতে থাকিব। মণিপুৰলৈ স্বাভাৱিক পৰিস্থিতি ঘূৰাই অনাটোৱে শ্বাহৰ এই ভ্ৰমণৰ লক্ষ্য।