এয়াৰ ষ্ট্ৰাইকত নিহত সন্ত্ৰাসবাদীৰ হিচাপ বিছৰাসকলে পাকিস্তানলৈ গৈ মৃতদেহ হিচাপ কৰক : ৰাজনাথ সিং
ভাৰতীয় বায়ু সেনাবাহিনীয়ে পাকিস্তানৰ বালাকোটত কৰা এয়াৰ ষ্ট্ৰাইকত নিহত হোৱা সন্ত্ৰাসবাদীৰ সংখ্যা বিছৰা বিৰোধী দল সমূহক কঠোৰ সমালোচনা কৰিছে কেন্দ্ৰীয় গৃহ মন্ত্ৰী ৰাজনাথ সিঙে। মঙলবাৰে ধুবুৰীত বিশাল জনসভাত অংশ লৈ বায়ু সেনা বাহিনীয়ে মৃত্যু হোৱা সন্ত্ৰাসবাদীৰ সংখ্যা গণনা নকৰে বুলি মন্তব্য কৰে সিঙে।
পুলৱামাৰ সন্ত্ৰাসবাদীৰ আত্মঘাটি আক্ৰমণৰ প্ৰতিশোধ স্বৰূপে ভাৰতীয় বায়ু সেনা বাহিনীয়ে পাকিস্তানৰ বালাকোটত থকা জঈচ-ঈ-মহম্মদৰ ঘাটিত আক্ৰমণ কৰিছিল। বিজেপিৰ নেতা সকলে বায়ু সেনা বাহিনীৰ আক্ৰমণত কমেও ৩০০ তকৈও অধিক সন্ত্ৰাসবাদী নিহত হোৱা বুলি দাবী কৰিছিল। বিজেপিৰ এই দাবীৰ পিছতে বিৰোধী দল কংগ্ৰেছে নিহত হোৱা সন্ত্ৰাসবাদীৰ হিচাপ বিচাৰে।
মঙলবাৰে ধুবুৰীত ভাৰত-বাংলাদেশ সীমান্তৰ অত্যাধুনিক সীমান্ত বেৰ প্ৰকল্পৰ উদ্বোধনী কৰিবলৈ আহি কংগ্ৰেছৰ বিৰুদ্ধে সমালোচনাত এইদৰে সৰৱ হৈ পৰা দেখা যায় ৰাজনাথ সিঙক। ভাৰতীয় সেনা বাহিনীয়ে প্ৰয়োজন হ’লে সন্ত্ৰাসবাদীক দমনৰ বাবে পাতাললৈ যাবলৈও সাজু আছে বুলি কয় কেন্দ্ৰীয় মন্ত্ৰীজনে।
আনহাতে, পাকিস্তানত নিহত হোৱা সন্ত্ৰাসবাদীৰ হিচাপ বিচৰা কংগ্ৰেছী সকলক নাটক কৰা বুলি আখ্যা দি মৃতদেহৰ হিচাপ কৰিবলৈ যদি আগ্ৰহ আছে পাকিস্তানলৈ যোৱাৰ বাবে পৰামৰ্শ দিয়ে ৰাজনাথ সিঙে।
ৰাজনাথ সিঙৰ লগত মঙলবাৰে জনসভাখনত অসমৰ মুখ্য মন্ত্ৰী সৰ্বানন্দ সোণোৱালো উপস্থিত থাকে।