মহানগৰীত কেন্দ্ৰীয় মন্ত্ৰী কিৰেণ ৰিজিজুৰ প্ৰতিমূৰ্তি দাহ : চাকমা-হাজং শৰণাৰ্থীক অসমত সংস্থাপনৰ অভিসন্ধি প্ৰত্যাহাৰৰ দাবী

মহানগৰীৰ গণেশগুৰিত আম আদমী পাৰ্টিৰ স্বেচ্ছাসেৱক সকলে দাহ কৰে কেন্দ্ৰীয় মন্ত্ৰী কিৰেন ৰিজিজুৰ প্ৰতিমূৰ্তি। অৰুণাচলত বসবাস কৰা চাকমা-হাজং শৰণাৰ্থী সকলক অসমত সংস্থাপনৰ বিৰোধিতাৰে আপ অসমৰ স্বেচ্ছাসেৱক সকলে পালন কৰে এই প্ৰতিবাদী কাৰ্যসূচী।

অসমৰ সচেতন জনসাধাৰণে চৰকাৰৰ এই জাতি ধ্বংসী সিদ্ধান্ত কোনো পধ্যেই মানি নলয় বুলি বি জে পি নেতৃত্বাধীন কেন্দ্ৰীয় তথা ৰাজ্য চৰকাৰক সকীয়াই দিয়ে আপৰ নেতা – কৰ্মী সকলে। প্ৰায় এঘণ্টা ধৰি প্ৰতিবাদত উত্তাল হয় গণেশগুৰিৰ ট্ৰেফিক পইন্টত।

আপৰ প্ৰতিবাদ কাৰী সকলক আৰক্ষীয়ে বাধা প্ৰদান কৰে। আৰক্ষীৰ প্ৰতিৰোধৰ মাজতে আপ, অসমৰ জ্যেষ্ঠ মুখপাত্ৰ অনুৰূপা ডেকাৰজাই কয়, ” বিজেপি চৰকাৰে অসমৰ খিলঞ্জীয়া জাতি জনগোষ্ঠীৰ বাবে ভাবুকি কঢ়িয়াই আনিছে। যি সময়ত অসমৰ থলুৱা ভূমিহীন কৃষকক চৰকাৰে সংস্থাপিত কৰিব পৰা নাই, যি সময়ত আমাৰ যুৱক যুৱতীসকলে কৰ্মসংস্থান লাভৰ পৰা বঞ্চিত হৈছে, চৰকাৰে থলুৱা নাগৰিকক সুৰক্ষা প্ৰদানত ব্যৰ্থ হৈছে, সেই সময়ত অৰুণাচল প্ৰদেশৰ পৰা চাকমা – হাজং শৰণাৰ্থী সকলক আনি অসমত সংস্থাপন দিব বিচাৰিছে। আম আদমী পাৰ্টিয়ে চৰকাৰৰ এই অসমবিৰোধী অভিসন্ধি কোনো পধ্যেই মানি নলয়। ”

আপৰ নেত্ৰী গৰাকীয়ে কেন্দ্ৰীয় মন্ত্ৰী কিৰেন ৰিজিজুৰ লগতে গৃহমন্ত্ৰী অমিত শ্বাহৰ বিৰুদ্ধেও সৰৱ হয়। আজি আপৰ প্ৰতিবাদী কাৰ্যসূচীত গুৱাহাটী পৌৰ নিগমৰ ৱাৰ্ড মেম্বাৰ মাছুমা বেগম, আপৰ মিডিয়া পেনেলিষ্ট নীলমণি শইকীয়া, মহানগৰ সমিতিৰ সম্পাদক জিতু ডেকাৰ লগতে বহুকেইগৰাকী দলীয় নেতাই অংশগ্ৰহণ কৰে।