অনলাইন ভিডিঅ’ চাই নিজেই কৰিছিল লিংগ পৰিৱৰ্তনৰ অস্ত্ৰোপচাৰ! তাৰপিছতে যুৱকৰ লটিঘটি

পুৰুষ শৰীৰত নাৰীৰ আত্মা। ২০ বছৰীয়া যুৱকজনে দীৰ্ঘদিন ধৰি নিজৰ লিংগ সলনি কৰাৰ কথা চিন্তা কৰি আছিল। কিন্তু পাৰিবাৰিক বাধা আৰু সামাজিক লজ্জাৰ বাবে তেওঁ ডাক্তৰৰ ওচৰলৈ যোৱা নাছিল। বৰঞ্চ অনলাইনত আনুষংগিক পদ্ধতিটো চোৱাৰ পিছত যুৱকজনে নিজেই অস্ত্ৰোপচাৰটো কৰে।

কিন্তু এনে সাহসী পদক্ষেপৰ ফলত লিংগ পৰিৱৰ্তন নহ’ল যদিও অত্যধিক ৰক্তক্ষৰণৰ বাবে তেওঁৰ জীৱন বিপদত পৰিল। শেষত সঠিক সময়ত চিকিৎসালয়ত ভৰ্তি হোৱাৰ লগে লগে পৰিস্থিতি নিয়ন্ত্ৰণ কৰা সম্ভৱ হৈ উঠিল।

উত্তৰ প্ৰদেশৰ প্ৰয়াগৰাজত সংঘটিত হৈছে এই কৰুণ ঘটনা। বাতৰি অনুসৰি, আমেথি জিলাৰ বাসিন্দা যুৱকজনে চৰকাৰী প্ৰতিযোগিতামূলক পৰীক্ষাৰ বাবে প্ৰস্তুতি চলাইছিল। একে সময়তে বহু দিন ধৰি নিজৰ ইপ্সিত আকাংক্ষা পূৰণৰ উপায়ো সযতনে বিচাৰি আছিল।

অৱশেষত অনলাইন ভিডিঅ’ চাই তেওঁ নিজেই অস্ত্ৰোপচাৰ কৰাৰ চৰম পদক্ষেপ ল’লে। যদিও যুৱকজনে দাবী কৰিছে যে তেওঁ এই বিষয়ত এগৰাকী স্থানীয় চিকিৎসকৰ সৈতেও কথা পাতিছিল।

যুৱকজনে জনোৱা মতে, ভিডিঅ’টোত দেখুওৱা পদ্ধতিৰে লোকেল এনাস্থেচিয়া প্ৰয়োগ কৰি অস্ত্ৰোপচাৰ ছুৰীৰে নিজৰ যৌনাংগ কাটি পেলায়। কিন্তু তাৰ পিছত তেওঁ ৰক্তক্ষৰণ বন্ধ কৰিব নোৱাৰিলে। ইয়াৰ মাজতে এনাস্থেচিয়াৰ প্ৰভাৱো শেষ হৈ গ’ল। ফলত তীব্ৰ বিষৰ বাবে আৰু থাকিব নোৱাৰিলে। ঘৰৰ মালিকৰ সহায়ত তেওঁ চিকিৎসালয় পালেহি।

চিকিৎসকে জানিবলৈ দিয়া মতে, যুবকজন যথাযথ সময়ত চিকিৎসালয়ত উপস্থিত হোৱাৰ বাবে আপাততঃ তেওঁৰ জীৱনৰ আশংকা দূৰ হৈছে। অৱশ্যে আঘাতৰ চিকিৎসাৰ প্ৰয়োজন। লিংগ পৰিৱৰ্তনৰ ক্ষেত্ৰত দীঘলীয়া চিকিৎসা পদ্ধতি আছে। তাৰ জৰিয়তেহে কেবল এই ৰূপান্তৰ সম্ভৱ।